Bıýdjetti shaǵyn toppen josparlaýdy qoıý kerek — Máýlen Áshimbaev

ASTANA. KAZINFORM — Senat tóraǵasy Máýlen Áshimbaev Qarjy mınıstri Mádı Tákıevke bıýdjetti josparlaý isine táýelsiz sarapshylar men qoǵamdyq keńesterdi tartý joldaryn pysyqtaýdy usyndy.

2024 jylǵy bıýdjettiń ıgerilýi týraly esepti talqylaǵan senatorlar bir ret bekitilgen bıýdjetti qaıta-qaıta ózgertý beleń alyp otyrǵanyn narazylyq bildirdi. Olardyń bul ýájin senat spıkeri de qýattady.

— Byltyr bıýdjettiń shyǵys bóligin bir jyldyń ishinde 13 ret, tabys bóligin 3 ret ózgerttińizder. Onyń túsimderge, salyqtarǵa baılanysty obektıvti sebepteri de bolǵan shyǵar. Biraq bul jerde úlken júıeli máseleler týyndaıdy ǵoı. Nege olaı josparlanǵan? Josparlanǵan kezde atústi jasalǵan nárse me? Olaı bolsa, josparlaǵan adamdardyń jaýapkershiligi qandaı? Olar jaýapkershilikke tartyldy ma, joq pa? Álde kelesi jyly da sol metodıkamen júre bere me? Josparlaý derekter negizinde jasalady ǵoı. Bastapqy derekter durys alynǵan ba? Osyndaı keshendi túrde qarap, bıýdjetti josparlaý máselesi bir deńgeıge shyǵarý kerektigi anyq. Ári qaraı da bulaı bola bermeıdi endi, — dedi ol.

Senat tóraǵasy Qarjy mınıstrine bıýdjetti josparlaýdyń ashyq formatyn oılap tabý kerektigin aıtty.

— Bir jylda bıýdjetti 13 ret ózgertý degen bir rekord qoı. Ári qaraı ondaı rekordqa jete qoımaspyz dep senemiz. Osy baǵytna kóptegen jumys istelý kerek sııaqty. Josparlaýdy mınıstrlikter ózderi ǵana otyryp jasaı bermeı, mamandardy, táýelsiz sarapshylardy qoǵamdyq keńester arqyly tartýdyń formasyn tabý utymdy bolatyn shyǵar. Korporatıvti túrde jasalsa, 1-2 adam ǵana óz oıymen jasaı berse, erte me, kesh pe qatelikter ákeletini túsinikti. Sondyqtan bıýdjetti josparlaý protsesiniń ashyqtyǵyn da, jańa prıntsıpterinde qamtamasyz etetin ýaqyt kelgen sııaqty, — dedi Máýlen Áshimbaev. 

Buǵan deıin 2024 jylǵy bıýdjettiń 13 ret ózgertilgenin Joǵary aýdıtorlyq palata da josparlaýdyń sapasyzdyǵymen baılanystyrǵan bolatyn.