Bıýdjetke jospardan 52 mlrd teńgege artyq kiris tústi - Sultanov

ASTANA. QazAqparat - Úkimettiń búgingi otyrysynda QR Qarjy mınıstri Baqyt Sultanov alǵashqy úsh aıda bıýdjetti ıgerý sharalary jaıynda baıandap berdi, dep xabarlaıdy QazAqparat tilshisi.

Onyń aıtýynsha, qazirgi kezde barlyq deńgeıdegi bıýdjetterdiń kiristeri artyǵymen oryndalyp otyr. Máselen, respýblıkalyq bıýdjetke 1 trln. 157 mlrd. teńge kiris tústi. Ol bastapqy jospardan 52 mlrd. teńgege, al ótken jyldyń alǵashqy toqsanymen salystyrǵanda 137 mlrd. teńgege artyq. Al jergilikti bıýdjetterdiń óz kiristeri 136 mlrd. teńgege artyǵymen oryndalyp, 540 mlrd. teńgeni qurady. Osynyń arqasynda bıýdjet aqshasyn el ekonomıkasyna kóptep quıýǵa múmkindik týdy. «Bıýdjet qarajatynyń ıgerilmeýi eki esege azaıdy. Ústimizdegi jyldyń bıýdjetin tıimdi ári tolyqqandy oryndalýyn qamtamasyz etý úshin onlaın monıtorıng qolǵa alyndy. Qurylys salasyndaǵy memlekettik satyp alýdy qazynashylyq baqylaý jáne iri satyp alýlarda tenderlerdi ortalyqtandyrý arqyly otandyq óndirýshilerdi qoldaýǵa arnalǵan pılottyq jobalar bastaldy», - dep atap kórsetti Sultanov.

Aıta keteıik, Úkimettiń búgingi otyrysynda elimizdiń áleýmettik-ekonomıkalyq damýy boıynsha alǵashqy úsh aıdyń qorytyndysy qaraldy. QR Ulttyq ekonomıka mınıstri Tımýr Súleımenovtyń aıtýynsha, búginde xalyqtyń nesıeni teńgemen kóptep ala bastaǵany baıqalǵan. Budan bólek, ortasha jalaqynyń kólemi de ósip otyr.