Bıýdjetke túzetý engizile me - mınıstr jaýaby

ASTANA. QazAqparat - QR Ulttyq ekonomıka mınıstri Tımýr Súleımenov bıýdjetke túzetý engizý múmkindigine qatysty pikir bildirdi, dep habarlaıdy QazAqparat tilshisi.

«Bizde bıýdjettik baǵdarlamalardyń oryndalý táýekeline kúdik kelip otyrǵan joq. Óıtkeni, búkil bıýdjet teńgemen qalyptastyrylady.  Aǵymdaǵy jyldyń tamyzynda baǵamnyń ózgerý yqpaly turǵysynan alar bolsaq, biz óz bıýdjetimizde ortasha jyldyq baǵamdy alamyz. Ol  340 teńgeden asty, al jyl sońyna deıin baǵam 363 teńgeden asyp jyǵylýy qajet. Jyldyń birinshi jartyjyldyǵynda 340 teńgeden tómen bolýyna baılanysty bıýdjettik baǵdarlamalardyń oryndalýyna qandaı da bir qaýip kórip otyrǵanymyz joq», - dedi mınıstr Úkimet otyrysynan keıin BAQ ókilderine bergen suhbatynda.

Tımýr Súleımenov bıýdjettiń qaıta qaralý múmkinshiligin de joqqa shyǵardy.

«Dál qazirgi sátte bıýdjetti naqtylaýǵa qatysty aıtar bolsam, ádette ol kúzde, qazan aıynda bolady. Ol tek qana makroekonomıkalyq faktorlarmen baılanysty júrgizilmeıdi. Ol kóp jaǵdaıda bıýdjettiń oryndalýyna, tolyqtaı alǵanda ekonomıkanyń damýyna baılanysty, tek bir baǵana faktorǵa baılanyp turǵan joq. Ázirshe, bizdiń ekonomıkamyz qalaı ilgerlep kele jatqanyn, memlekettik baǵdarlamalar  qalaı oryndalý ústinde ekendigin, salalardaǵy, oblystardaǵy ahýal qandaı ekendigin baǵalaımyz. Osyndaý keshendi baǵalaýǵa baılanysty biz naqtylaý jasaý qajet pe, joq pa ekendigin sheshemiz. Bir ǵana baǵamnyń ózgerýi bıýdjettik naqtylaý úshin jetkiliksiz», - dedi ol.