Bıýdjetke lımıt, legıonerlerdi shekteý, ekstremızmniń aldyn alý – Sport týraly jańa zań qandaı ózgeris ákeledi
ASTANA. KAZINFORM – QR Týrızm jáne sport mınıstriniń orynbasary Serik Jarasbaev sport salasyn reformalaý sharalary týraly aıtyp berdi.
Onyń aıtýynsha, mınıstrlik ázirlegen «Dene shynyqtyrý jáne sport týraly» zań jobasy 29 qańtarda Májilistiń ekinshi oqylymynda maquldandy jáne Senat qaraýyna engizildi.
− Zań jobasy sport salasyna birqatar ózgerister engizýdi kózdeıdi: kásibı oıyn sporty klýbtaryn ustaýǵa bólinetin bıýdjet qarajatyna lımıt bekitý; QR azamattyǵyn almaǵan sportshylardy bıýdjet esebinen qarjylandyrýǵa tyıym salý; «sporttyń basym túrleri» uǵymyn naqtylap, olardyń óńirlik tizbesin bekitý, − dedi S. Jaraspaev Ortalyq kommýnıkatsııalar qyzmetinde ótken baspasóz máslıhatynda.
Sonymen birge, akkredıttelgen sport federatsııasyna dinı ekstremızm men terrorızmniń aldyn alý úshin sharalar qabyldaý mindetteledi. Sport federatsııalaryn akkredıtteý talaptary belgilenip, «múgedektigi bar sportshyny súıemeldeýshi» uǵymy engiziledi. Memlekettik dene shynyqtyrý jáne sport uıymdarynyń basshylaryn rotatsııalaý bastalady.
Mınıstrlik janynan óńirlik sport basqarmasy basshylaryn kelisý boıynsha arnaıy komıssııa quryldy. Búgingi tańda komıssııa otyrysynda 11 óńirdiń basqarma basshylarynyń kandıdatýralary kelisildi.
− Eń negizgi jańalyq – 60-qa jýyq basym sport túrleri anyqtaldy. Olarǵa Olımpıada, Paralımpıada, Sýrdlımpıada, Azııa jáne Parazııa oıyndarynyń baǵdarlamalaryna engen sport túrleri, olımpıadalyq emes sport túrlerinen Azııa jáne Parazııa oıyndaryna engen sport túrleri jáne ulttyq sport túrleri tolyq qarastyryldy, − dep tolyqtyrdy spıker.
Respýblıkalyq jáne aımaqtyq akkredıttelgen sport federatsııalarynyń mártebesin ulttyq akredıttelgen sport federatsııalaryna ózgertý máselesi engizildi. Sport federatsııalaryn akkredıtteýge qosymsha talaptar aıqyndalady.
Kelesi norma – birinshi toptaǵy múgedek sportshynyń súıemeldeýshisi jattyǵýlar men jarystar kezinde onyń janynda bolady. Bul standart múmkindigi shekteýli sportshylardyń ulttyq jáne halyqaralyq jarystarǵa daıyndyq sapasyn arttyrady jáne 2025-2027 jyldary shamamen 1671 sportshyny qamtıdy.
Osyǵan deıin sport legıonerlerin bıýdjet esebinen qarjylandyrýǵa tyıym salynatyny týraly habarlandy.