Bıýdjetke qatysý: Almatyda quny 1,2 mlrd teńge bolatyn 49 joba júzege asyryldy

ALMATY. QazAqparat - Óńirlik kommýnıkatsııalar qyzmetiniń alańynda Almaty qalasy ákiminiń orynbasary Іlııas Óserov jýrnalısterge qala turǵyndarynyń qatysýymen júzege asyrylatyn «Bıýdjetke qatysý» jobasy týraly aıtty, dep habarlaıdy QazAqparat tilshisi.

Bul joba boıynsha kez-kelgen qala turǵyny qalalyq ortany damytý jóninde óz ıdeıasyn usyna alady.

Daýys berý barysynda basqa da turǵyndar qoldasa, ol qalalyq bıýdjet esebinen júzege asyrylady.

Bul ádis azamattar men jergilikti bılik organdary arasyndaǵy aýmaqtardy barynsha tıimdi basqarý jónindegi dıalogty qalyptastyrady.

Іlııas Óserov pılottyq jobanyń 2019 jyldyń tamyz aıynda engizilgenin, ol kezde 2020 jyly iske asyrylýy tıis ótinishterdiń qaralǵanyn aıtty.

Osy maqsattar úshin budget.open-almaty.kz arnaıy portaly iske qosyldy, sondaı-aq ótinim berýden bastap daýys berý qorytyndylaryn shyǵarýǵa deıingi protsestiń barlyq kezeńi synaqtan ótti.

«2019 jyly jobalyq usynystardy qabyldaý kezeńinde barlyǵy jalpy somasy 14,5 mlrd teńge bolatyn 333 joba qabyldandy, onyń ishinde saraptaý komıssııalarynyń irikteý nátıjeleri boıynsha 228 joba daýys berýge jiberildi. Ár aýdanǵa 500 mln teńgeden josparlandy, bir jobanyń quny 100 mln teńgeni qurady», - dedi ákimniń orynbasary.

Ashyq daýys berý arqyly qala turǵyndarynyń ózderi eń úzdik jobany tańdady, aqshany nege jumsaý kerektigin anyqtady. Barlyǵy 55 joba iske asyrýǵa jiberildi. Qazirdiń ózinde jalpy quny 1,2 mlrd teńge bolatyn 49 joba oryndaldy.

2021 jyly «Bıýdjetke qatysýdyń» jalpy somasy 7,4 mlrd teńgege deıin ósti – ár aýdanǵa 800 mln teńgeden, bir jobanyń quny 55,5 mln teńgeni qurady.

«Qalaǵa qosylǵan aýmaqtardy damytý maqsatynda, «Bıýdjetke qatysý» baǵdarlamasy aıasynda Naýryzbaı men Alataý aýdandaryna qosymsha 500 mln teńgeden bólý qarastyryldy. Osylaısha, atalǵan eki aýdannyń árqaısyna bólingen qarajattyń jalpy somasy 1,3 mlrd teńgeni qurady», - dedi Іlııas Óserov.

Joba aıasynda 23,7 mlrd teńgege 796 jobalyq usynys tústi. Bul 2020 jylmen salystyrǵanda 463 jobaǵa artyq.

«Bıyl halyqtyń bıýdjetke qatysýy aıasynda Almaty aýdandaryn kógaldandyrý boıynsha jalpy somasy 282,8 mln teńge bolatyn 7 joba iske asyrylýda. Sondaı-aq, 1 122,4 mln teńgege trotýarlardy, pandýstardy, aryqtardy jóndeý boıynsha 38 joba iske asyryldy. Tizimde qoǵamdyq oryndardy, saıabaqtardy, skverlerdi, jaıaý júrginshiler aımaqtaryn qurý, jóndeý men jaryqtandyrý boıynsha jalpy somasy 2 552,4 mln teńge bolatyn 75 joba bar»,-deıdi ol.

Budan ózge, qoqys oryndaryn joıý boıynsha 15 joba, áńgimelesetin jerlerdi, oryndyqtardy, ýrnalardy, balalar alańdary men demalys oryndaryn jasaý men jóndeý boıynsha 20 joba iske asyrylýda.

Aýla aýmaqtarynda sporttyq, jattyǵý alańdaryn, fýtbol, basketbol, voleıbol alańdaryn, balalar oıyn alańdaryn ornatý, jóndeý boıynsha 118 joba iske asyrylýda.

Aıta keteıik, «Bıýdjetke qatysý» jobasy boıynsha ótinimder jyl boıyna qabyldanady.