Bıýdjetke bólý úshin ulttyq qordan 600 mln dollar valıýta satylady
ASTANA. KAZINFORM — Ulttyq bank shilde aıynyń qorytyndysy boıynsha, 1 dollarǵa shaqqandaǵy teńge baǵamy 474,15 teńgege deıin 0,5%-ǵa álsiregenin habarlady. Qazaqstan qor bırjasyndaǵy saýda-sattyqtyń ortasha kúndik kólemi bir aıda 183 mln AQSh dollarynan 170 mln AQSh dollaryna deıin tómendedi. Saýda-sattyqtyń jalpy kólemi 3,7 mlrd AQSh dollaryn qurady.
Ulttyq qordan respýblıkalyq bıýdjetke transfertterdi qamtamasyz etý úshin shilde aıynda 506 mln AQSh dollaryna valıýta satyldy.
Ulttyq qordan satý úlesi jalpy saýda-sattyq kóleminiń 14%-yn jáne kúnine 23 mln AQSh dollarynan aspaıtyn mólsherdi qurady.
Ulttyq bank Ulttyq qordyń qarajatymen operatsııa júrgizý kezinde naryqtyq beıtaraptyq qaǵıdatyn saqtaıdy.
Bul — shetel valıýtasyn udaıy jáne birkelki satýdy bildiredi. Mundaı tájirıbe Ulttyq qor operatsııalarynyń valıýta naryǵyna áserin barynsha azaıtýǵa múmkindik beredi.
Ulttyq bank BJZQ zeınetaqy aktıvteriniń valıýtalyq úlesin 30% deńgeıinde ustap turý maqsatynda shildede bırjalyq saýda-sattyqta shetel valıýtasyn satyp alýdy jalǵastyrdy.
Onyń jalpy somasy 275 mln AQSh dollaryn nemese naryqtyń jalpy kóleminiń shamamen 7%-yn qurady.
Ulttyq bank Úkimettiń Ulttyq qorǵa «Qazatomónerkásip» AQ aktsııalaryn satyp alý týraly sheshimin iske asyrý aıasynda Ulttyq banktiń altynvalıýta rezervterine konvertatsııalaýdy júrgizdi.
Konvertatsııa Ulttyq qordyń valıýtalyq aktıvteriniń bir bóligin satý arqyly iske asyryldy.
Naryqtyq beıtaraptyqty saqtaý maqsatynda Ulttyq bank shildeniń ortasynan bastap satyp alynǵan kólemdi birkelki túrde satýǵa kiristi.
Shildede atalǵan operatsııa aıasynda Ulttyq banktiń altyn-valıýta rezervterinen satý kólemi 115 mln AQSh dollaryn qurady.
2024 jylǵy tamyz aıynda altyn-valıýta rezervterinen 230 mln AQSh dollarynan 250 mln AQSh dollaryna deıingi kólemde valıýta satyp alý kútilýde.
Respýblıkalyq bıýdjetke transfert bólýge Úkimettiń aldyn ala boljamdy ótinimi boıynsha 2024 jylǵy tamyzda Ulttyq bank Ulttyq qordan 500 mln AQSh dollarynan 600 mln AQSh dollaryna deıingi mólsherde valıýta satylýyn kútedi.
2024 jylǵy tamyzda BJZQ zeınetaqy aktıvteriniń valıýtalyq úlesin ustap turý úshin 200 mln AQSh dollarynan 250 mln AQSh dollaryna deıingi mólsherde valıýta satyp alý kútilýde.
Ulttyq bank transparenttilik qaǵıdaty sheńberinde valıýta naryǵynda júrgiziletin barlyq operatsııa týraly aqparatty tolyq ashyp kórsetýdi maqsat etedi.
Qysqamerzimdi perspektıvada teńgeniń dınamıkasy naryqqa qatysýshylardyń kútýlerine, toqsandyq salyq tólemderine, álemdik naryqtardaǵy ahýalǵa jáne geosaıası jaǵdaıdyń ózgerýine baılanysty bolady.
Ulttyq bank teńgerimsizdiktiń jınaqtalýyn boldyrmaıtyn jáne altyn-valıýta rezervteriniń saqtalýyn qamtamasyz etetin ıkemdi baǵam belgileý rejımin ustana beredi.
