Bıýdjetke 730 mlrd teńge salyq tolyq túspegen - Joǵary aýdıtorlyq palata
ASTANA. KAZINFORM – 2025 jyly respýblıkalyq bıýdjetke 730 mlrd teńge kóleminde salyq tolyq túspegen. Bul salyqtyq jáne kedendik ákimshilendirý tıimdiligine júrgizilgen memlekettik aýdıt barysynda anyqtaldy, dep habarlaıdy Joǵary aýdıtorlyq palata.
Aýdıt qorytyndysy boıynsha esepti kezeńde respýblıkalyq bıýdjetke túsetin salyqtyq túsimder jospary 4,8%-ǵa oryndalmaǵan. Memlekettik aýdıtorlardyń málimetinshe, negizgi sebepterdiń biri – salyq túsimderiniń 1,3 trln teńgege artyq josparlanýy.
– Memlekettik aýdıtorlardyń anyqtaýynsha, esepti kezeńde respýblıkalyq bıýdjetke túsetin salyqtyq túsimder jospary tolyq oryndalmaǵan. Túspegen soma 730 mlrd teńge nemese 4,8%-dy qurady. Negizgi sebepterdiń biri – salyq boıynsha boljamnyń 1,3 trln teńgege artyq josparlanýy, – delingen Joǵary aýdıtorlyq palatanyń habarlamasynda.
Aýdıt barysynda sońǵy tórt jylda qosymsha eseptelgen salyqtarǵa qatysty daýlardyń jartysynan astamy salyq tóleýshilerdiń paıdasyna sheshilgeni belgili boldy. Buǵan salyq zańnamasynyń talaptaryn buzý jáne tekserý aktilerin rásimdeý kezinde jiberilgen qatelikter sebep bolǵan.
Sonymen qatar kedendik ákimshilendirýde de birqatar zańbuzýshylyq anyqtalǵan. Atap aıtqanda, elektr kólikterine arnalǵan jeńildikterdiń gıbrıdti avtomobılderdi ımporttaý kezinde de qoldanylýy saldarynan bıýdjetke keminde 70 mln teńge túspegen.
Budan bólek, syrtqy ekonomıkalyq qyzmettiń 34 qatysýshysy ımport kezinde qosylǵan qun salyǵyn esepke jatqyzý ádisimen zańsyz tólegen. Sonyń saldarynan bıýdjetke ımporttyq QQS boıynsha 670 mln teńgeden astam qarajat túspegen.
– Aýdıt qorytyndysy boıynsha 2,7 mlrd teńge kóleminde qarjylyq buzýshylyq anyqtaldy. Sondaı-aq 33 rásimdik buzýshylyq pen 11 júıeli kemshilik tirkeldi. Anyqtalǵan máseleler boıynsha tıisti tapsyrmalar men usynymdar ázirlenip, olardy oryndaý aýdıt obektileriniń baqylaýyna alyndy, – dep málimdedi Joǵary aýdıtorlyq palata.
Sondaı-aq aýdıt aıaq kıim ónimderin mindetti tańbalaý júıesiniń áleýeti tolyq paıdalanylmaı otyrǵanyn jáne Memlekettik kirister komıtetine memlekettik qyzmetterdiń sapasyn baqylaý men monıtorıng júrgizý júıesin jetildirý qajet ekenin kórsetti.
Aıta keteıik, Qazaqstanda tsıfrlyq aktıvterden tabys tapqan azamattar úsh jyl boıy jeke tabys salyǵyn tólemeıdi.
