Bıýdjetke 124 mlrd teńge shyǵyn kelgen: memlekettik baǵaly qaǵazdar shyǵarý retteledi
ASTANA. KAZINFORM — Joǵary aýdıtorlyq palatanyń tapsyrmasy boıynsha memlekettik baǵaly qaǵazdardyń shyǵarylýyn retteýdi jetildirýdiń jańa sharalary qabyldandy. Olar memleket resýrstaryn paıdalaný tıimdiligin arttyrýǵa jáne memleket boryshyn baqylaýdy kúsheıtýge baǵyttalǵan.
—2024 jylǵy jeltoqsanda QR Qarjy mınıstrligi Qazynashylyq komıtetiniń qyzmetine memlekettik aýdıt júrgizildi. Sonyń ishinde 2021-2023 jyldardyń keıbir aılarynda emıssııalyq baǵaly qaǵazdar bastapqyda josparlanǵan kólemnen artyq shyǵarylǵany anyqtaldy. Alaıda respýblıkalyq bıýdjettiń baqylaý shotynda qarajat bolady dep boljanǵan. Bul bıýdjettiń 124 mlrd teńgeden astam yqtımal shyǵyndaryna ákeldi, - delingen habarlamada.
Osyǵan baılanysty Joǵary aýdıtorlyq palata Qarjy mınıstrligine memlekettik qazynashylyq mindettemelerdi shyǵarý, ornalastyrý, aınalysqa qosý, qyzmet kórsetý jáne óteý erejesine ózgerister engizýdi tapsyrdy. Basty maqsat — aldaǵy kezeńge arnalǵan bıýdjet qarajatynyń qaldyqtary boıynsha oń boljam bolǵan jaǵdaıda ishki naryqta memlekettik baǵaly qaǵazdardyń negizsiz shyǵarylýyn boldyrmaý.
Nátıjesinde Qarjy mınıstriniń bıyl 30 mamyrdaǵy buıryǵymen qajetti ózgerister engizildi.
Memlekettik aýdıt qorytyndylary boıynsha berilgen basqa da usynymdar men tapsyrmalar tolyq oryndalǵanǵa deıin baqylaýda bolady.
Aıta keteıik, buǵan deıin Joǵary aýdıtorlyq palata múshesi Nurlan Nurjanov byltyr Qazaqstannyń bıýdjet tapshylyǵy 10 jylda bolmaǵan absolıýttik mánge jetkenin aıtqan edi.