Bıýdjetke 11 trln teńge kiris túsip, jospar artyǵymen oryndaldy - Erulan Jamaýbaev
«Bıylǵy 9 aıdyń qorytyndysy boıynsha memlekettik qarjynyń atqarylý kórsetkishterine toqtalsaq, memlekettik bıýdjetke 11 trln 177 mlrd teńge somasynda kiris tústi nemese jospar 104,8 paıyzǵa oryndaldy. Respýblıkalyq bıýdjetke 7,5 trln teńge shamasynda kiris tústi nemese jospar 101,9 paıyzǵa oryndaldy», - dedi E. Jamaýbaev.
Osy oraıda ol kirister boıynsha jospar 143 mlrd teńgege artyǵymen oryndaldy, onyń ishinde salyq - 55 mlrd teńgeni, salyqqa jatpaıtyn kirister 89 mlrd teńgeni qurady.
«Jospar ımporttyq keden bajy, korporatıvtik tabys salyǵy jáne shıki munaıǵa salynatyn eksporttyq keden bajyna qatysty oryndalmady. Korporatıvtik tabys salyǵy turǵysynda jospardyń oryndalmaýy 2022 jyldyń 9 aıynda 632 iri salyq tóleýshi boıynsha málimdelgen avanstyq tólemder somasynyń byltyrdyń uqsas kezeńimen salystyrǵanda 29 paıyzǵa azaıýyna baılanysty. Sonymen qatar jergilikti bıýdjetterdiń kiris 111,2 paıyzǵa atqaryldy jáne 3,7 trln teńgeni qurady. Jospar 371 mlrd teńgege, onyń ishinde salyq boıynsha 316 mlrd teńgege asyra oryndaldy. Kirister boıynsha josparlar barlyq óńirde asyra oryndalyp otyr», - dedi mınıstr.
