Bıýdjetke 1 mıllıard teńgege shyǵyn keltirgen basqarma basshysy ustaldy
Qoǵammen baılanys departamentiniń dırektory Arman Berdalınniń aıtýynsha, Mańǵystaý oblysynyń deneshynyqtyrý jáne sport basqarmasynyń basshysy laýazymdy ókilettiligin teris paıdalanǵany úshin kúdikke ilindi.
«Sybaılas jemqorlyqqa qarsy ulttyq bıýro Mańǵystaý oblysynyń deneshynyqtyrý jáne sport basqarmasynyń basshysyna qatysty sotqa deıingi tergeýdi bastady. Ol shetel kompanııasyn akkredıtteý sharasyn zańsyz jeńildetý, sondaı-aq, memlekettik-jekemenshik áriptestik kelisimi boıynsha muz saraıynyń qurylysyna is júzinde sáıkes kelmeıtin jabdyqty jetkizýdi rastaý arqyly laýazymyn teris paıdalanǵany úshin kúdikke ilinip otyr. Nátıjesinde memleket múddesine 1 mıllıard teńgeden astam somaǵa zalal keltirilgen. Sot kúdiktige qatysty kúzetpen ustaý túrindegi bultarpaý sharasyn sanktsııalady. Tergeý jalǵasýda», - dedi A.Berdalın Astanada ótken baspasóz máslıxatynda.