Bıýdjet jospary: Elorda tabysy aldaǵy úsh jylda 5 paıyzǵa ósip otyrady

NUR-SULTAN. QazAqparat –Nur-Sultan qalalyq Ekonomıka jáne bıýdjettik josparlaý basqarmasynyń basshysy Qaısar Mańqaraev máslıhat depýtattaryna 2021-2023 jyldarǵa arnalǵan qala bıýdjetiniń jobasyn tanystyrdy, dep habarlaıdy QazAqparat tilshisi.

«2021-2023 jyldardyń boljamyna sáıkes, qalanyń jeke tabysynyń kólemi 1 trln 1 mlrd 376 mln teńgeni quraıdy. Úsh jylǵa bólip qaraǵanda bul kórsetkish 2021 jyly 319,7 mlrd teńge, 2022 jyly 332,3 mlrd teńge, 2023 jyly 349,4 mlrd teńgeni kórsetedi», - dedi Qaısar Mańqaraev máslıhat otyrysynda.

Basqarma basshysy atap ótkendeı, astananyń jeke tabysy 2021 jyly 319,7 mlrd teńgege jetedi. Osylaısha 2020 jyldyń naqtylanǵan bıýdjetinen qaraǵanda 2021 jylǵy bıýdjet 5 paıyzǵa nemese 14,9 mlrd teńgege ósedi.

«Sonymen birge salyq túsimderi 315,9 mlrd teńgeni, salyqtyq emes túsimder 1,1 mlrd teńge, sondaı-aq negizgi kapıtaldy satýdan túsetin túsim 2,7 mlrd teńgege jetedi. Jalpy salyqtyq túsimder qalanyń aldaǵy úsh jyldyq tabysynyń 97 paıyzyn quraıdy. 2021-2023 jyl aralyǵynda jeke tabys boıynsha túsim 5 paıyzǵa nemese 15 mlrd teńgeden ósip otyrady», - dedi ol.