Bıýdjet josparynyń oryndalmaýyna salyq túsimderiniń azaıýy yqpal etti – Vıtse-mınıstr

ASTANA. KAZINFORM – Bıylǵy 11 aıda memlekettik bıýdjetke 19 trln teńge tústi nemese jospar 90 paıyzǵa oryndaldy. Bul týraly Qarjy vıtse-mınıstri Erjan Birjanov Úkimet otyrysynda baıandady.

Onyń ishinde respýblıkalyq bıýdjetke 11,8 trln teńge nemese jospardyń 82% tústi. Jospardyń oryndalmaýy salyqtar boıynsha túsimderdiń azaıýyna baılanysty boldy, ol 76%-ǵa atqarylǵan.

− Jospardyń oryndalmaýynyń negizgi sebepteri: ótken jyldyń sáıkes kezeńimen salystyrǵanda 10 aıda úshinshi elderden ımport kóleminiń 6,4%-ǵa nemese 2,3 mlrd AQSh dollaryna azaıýy jáne negizgi eksporttyq metalldar baǵasynyń arzandaýy. Óz kezeginde 602 iri salyq tóleýshi boıynsha avanstyq tólemder somasy 27%-ǵa nemese 267 mlrd. teńgege azaıdy, − dedi E. Birjanov.

Ótken jyldyń tıisti kezeńimen salystyrǵanda qosylǵan qun salyǵyn qaıtarý 2,5 ese ulǵaıyp, 981 mlrd teńgeni qurady. Soǵan qaramastan, salyqtar boıynsha atqarylmaý kórsetkishteri salyqtyq emes tólemderdiń 1 trln teńgege ulǵaıýy esebinen óteldi.

− Jergilikti bıýdjetterdiń menshikti kiristeri 108%-ǵa atqaryldy jáne 7,2 trln teńgeni qurady. Jospar 525 mlrd teńgege asyra oryndaldy. Ótken jylǵy osyndaı kezeńmen salystyrǵanda kirister 26,5%-ǵa ósti nemese 1,5 trln teńgege kóp tústi, − dep túsindirdi vıtse-mınıstr.