Bıýdjet jobasyn usynýdyń formaty ózgeredi - Senat

ASTANA. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine bıýdjet zańnamasyn jetildirý máseleleri boıynsha ózgerister men tolyqtyrýlar engizý týraly» QR Zańyn qabyldady. «100 naqty qadam» Ult josparyn júzege asyrýǵa baǵyttalǵan Zań endi Memleket basshysynyń qol qoıýyna joldanady.

Parlament qabyldaǵan zań bıýdjetti josparlaý sapasyn joǵarylatýdy qamtyp, bıýdjet jobasyn usynýdyń formatyn ózgertetin bolady. Máselen, qujatqa sáıkes, mınıstrler men oblys, Astana jáne Almaty qalalarynyń ákimderi úshin túıindi ındıkatorlardy bekitý qarastyrylady. Strategııalyq josparlar men bıýdjettik baǵdarlamalardyń jańa formatyn engizý, bıýdjettiń oryndalýy týraly esepti usyný formatyn ózgertý kózdeledi. Sonymen qatar memlekettik organdardyń derbestigin keńeıtý jáne jaýapkershiligin arttyrý maqsatynda memlekettik organdarǵa shaǵyn baǵdarlamalardy qospaǵanda, bıýdjettik baǵdarlama boıynsha shyǵystardyń jyldyq kólemin ózgertpesten derbes qaıta bólý quqyǵy beriledi. «Bul rette bir bıýdjettik baǵdarlama sheginde ınvestıtsııalyq jobalar jáne shaǵyn bıýdjettik damý baǵdarlamalary arasynda bıýdjet komıssııasynda qaramastan, 10 paıyzdan aspaıtyn, sondaı-aq bıýdjet komıssııasynyń mindetti túrde qaraýymen 10 paıyzdan artyq kólemde qarajatty qaıta bólý múmkindigi beriledi. Bundaı quqyqty berýge baılanysty bıýdjettik baǵdarlamalardyń tikeleı jáne túpkilikti nátıjelerine qol jetkizilmegeni úshin memlekettik organdardyń birinshi basshylary jáne bıýdjettik baǵdarlamalar basshylarynyń tártiptik jaýapkershiligi engiziledi», - deıdi Ulttyq ekonomıka mınıstri Erbolat Dosaev. Sonymen qatar zań arqyly Ulttyq qordyń qarajatyn paıdalanýdyń tıimdiligin arttyrý, ony qalyptastyrýdyń jáne paıdalanýdyń jyldyq esebiniń sapasyn kóterýge baǵyttalǵan sharalar da qamtylyp otyr.