Bıýdjet jobasy quptaldy - respýblıkalyq basylymdarǵa sholý
***
«Eýropadaǵy qaýipsizdik jáne yntymaqtastyq jónindegi uıym Parlamenttik Assambleıasynyń onynshy qysqy májilisi keshe óz jumysyn aıaqtady. Venanyń Hofbýrg saraıynda eki kúnge jalǵasqan otyrys jarııa túrde qaýipsizdik máseleleriniń keń aýqymyn talqylap úlgerdi», - dep jazady «Egemen Qazaqstan» gazeti senbilik sanyndaǵy «Venadaǵy Parlamentaralyq únqatysý» atty maqalasynda. Basylymnyń atap ótýinshe, EQYU Parlamenttik Assambleıasynyń Vıtse-prezıdenti bolyp tabylatyn Q.Toqaev Assambleıanyń Saıası máseleler men qaýipsizdik jónindegi jalpy komıtetiniń májilisinde ıadrolyq qarýdy taratpaý problemasyna arnalǵan baıandama jasady. «ıAdrolyq qarýsyzdaný úderisin halyqaralyq qoǵamdastyqtyń qatań ári tıimdi baqylaýyna qoıý úshin álemdik qoǵamdastyq joǵary saıası deńgeıde qol jetkizilgen barlyq kelisimderdi tolyǵymen oryndaýǵa baǵyttalǵan sharalardy qoldanýy tıis», - degen Senat Tóraǵasy.
***
Osy basylymda Májilis depýtaty Jarasbaı Súleımenovtiń «Besikten beli shyqpaı jatyp, ómirden nege túńiledi?» degen maqalasy jarııalandy. Avtordyń resmı derekterge súıenip jazýynsha, 2009 jyly elimizde 260 jasóspirim ózine-ózi qol jumsap ómirmen qosh aıtysqan. Jaǵdaı ótken jyly da túzele qoıǵan joq, el boıynsha osyndaı 237 oqıǵa tirkeldi. Ústimizdegi jyldyń da jaqsylyǵy shamaly bolǵaly turǵandaı. Bul - qanshama ata-ana qara jamylyp, botasynan aıyrylǵan bozingendeı eńirep qaldy, myńdaǵan júrekterge jara tústi degen sóz. «Jasóspirimderdiń ózderine ózderiniń qol salýyna kóbinese aıtylǵan syndy durys qabyldamaýy, qıyndyqtarǵa tózbeýi sebep bolady. Sondaı-aq, qoǵamdaǵy jat qylyqtarǵa áýes, nashaqorlar men maskúnemder sýıtsıdke beıim keledi. Ózine ózi qol jumsaıtyn jastardyń kóbeıýi - elimizdegi jastar saıasatynyń deńgeıiniń tómendigin kórsetedi», - dep jazady halyq qalaýlysy.
***
«Kórshiles ózbek aǵaıyndar Keńes Odaǵynyń Batyry Sabyr Raqymovtyń eskertkishin tuǵyrynan túsirip, Tashkenttegi batyrdyń atyndaǵy metropolıten stansysy men aýdannan onyń atyn alyp tastaǵany baspasóz betinde úlken dúrbeleń týǵyzyp, qoǵamdyq qozǵaý saldy. Bul oqıǵaǵa oraı túrli pikir aıtýshylar kóbeıdi. Batyrdyń esimin ulyqtaýdy sóz júzinde qaldyrmaı, is júzine asyrýshylar da tóbe kórsetip qaldy», - dep jazady «Alash aınasy» gazeti. Basylymnyń atap ótýinshe, Shymkent qalasy ákiminiń orynbasary Bahadyr Narymbetov tóraǵalyq etetin qalalyq onamastıkalyq komıssııa Ózbekstan Ortalyq partııa komıtetiniń hatshysy bolǵan Sh.Rashıdovtyń atyndaǵy kósheni qazaqtan shyqqan tuńǵysh general S.Raqymovtyń esimimen aýystyrý týraly sheshim shyǵarǵan. Bul jaıynda egjeı-tegjeıli aqparat alǵyńyz kelse, «Sabyr Raqymov Sh.Rashıdovtyń kóshesin «tartyp» aldy» degen maqalany oqyńyz.
«Alash aınasy» gazetiniń jazýynsha, Maǵjannyń murajaıynda Lenınniń sýreti ilinip tur. M.Jumabaevtyń týǵan aýyly Sarytomardaǵy osy murajaıǵa bas suqqan adamdardyń kóbi bul sýrettiń nelikten ilinip turǵanyn suraıtyn kórinedi. Al suraýǵa dábi barmaǵandary ózderinshe topshylap, «sol baıaǵy tiri júrgen kommýnısterdiń isi shyǵar» deıdi eken. Shynymen de, qalalardaǵy tas músinderine deıin alynyp tastalyp jatqanda, poezııa paıǵambary atanǵan qazaq aqyny murajaıynyń qaq tórinde mańdaıy jaltyrap «kún kóseminiń» turýynda ne syr bar? Bul qupııany bilgińiz kelse, basylymdaǵy «Maǵjannyń sýretin Lenın qutqaryp qaldy» degen maqalaǵa nazar salyńyz.
***
«Kelesi aptada Elbasy Nursultan Nazarbaevtyń «Ulttyq kompanııalardyń qundy qaǵazdaryn halyqqa satý» tapsyrmasyna qatysty Úkimette, Premer-mınıstr Kárim Másimovtiń tóraǵalyǵymen, keń aýqymdy talqylaý ótpek», - dep jazady «Aıqyn» gazeti búgingi nómirindegi «Bıýdjet jobasy quptaldy» degen maqalasynda. Prezıdenttiń tapsyrmasyna sáıkes, bılik osy jyldyń sońyna deıin «Samuryq-Energo» AQ, «KEGOC» AQ jáne «Qazposhta» AQ-tyń aktsııalaryn qor naryǵynda ornalastyrýdy qamtamasyz etýge mindetti. Ulttyq kompanııalardan kishkentaı bolsa da úles enshilegisi kelgen qazaqstandyqtardyń tańdaýyna usynylatyn kásiporyndar tizimi munymen shektelmeıdi: 2012 - 2013 jyldarda «QazMunaıGaz»-dyń, «Qazaqstan temir jolynyń» jáne «Qazatomprom» AQ-tyń aktsııalary qor naryǵyna shyǵarylýǵa tıis.
Ústimizdegi jyldyń ekinshi toqsanynan bastap azamattardy qujattandyrý quzyry qaıtadan Іshki ister mınıstrligine berilmek. Bul týrasynda «Aıqyn» gazetinde jaryq kórgen «Tólqujat berýdi qaıtadan Іshki ister mınıstrligi júzege asyrady» degen maqalada keńinen baıandalǵan. Mınıstrlik janynan Kóshi-qon polıtsııasy komıtetin qurý elimiz turǵyndarynyń birtutas monıtorıng júıesi men olarǵa qatysty tolyq aqparattar jıyntyǵyn jınaýǵa jol ashady. Sondaı-aq bul azamattarǵa jeke kýálik pen tólqujattardy keshiktirmeı berýge baqylaýdy kúsheıtýge múmkindik beredi. Buǵan qosa, Qazaqstanda turyp jatqan sheteldik azamattar men azamattyǵy joq turǵyndardy esepke alý, olarǵa elimizdiń azamattyǵyn berý týraly usynysty tekserý men saraptaý da osy komıtettiń quzyryna berilmek.
***
«Memleket basshysy Nursultan Nazarbaev keshe Jambyl oblysynyń ákimi Qanat Bozymbaevty qabyldady», dep jazady «Kazahstanskaıa pravda» gazeti. Q.Bozymbaev Prezıdentke 2010 jylǵy oblystyń áleýmettik-ekonomıkalyq damýynyń qorytyndylary, aǵymdaǵy jylǵa arnalǵan jospary týraly baıandady. Kezdesý barysynda sondaı-aq Jambyl oblysynda iske asyrylyp jatqan ınvestıtsııalyq jobalar týraly áńgime boldy. 2010 jyly ınvestıtsııa tartý kólemi 140 mıllıardtan astam teńgeni qurady, bul 2009 jylǵydan 58 paıyz artyq. Óńdeýshi, metallýrgııalyq jáne ken-baıytý salalary basym baǵyttar bolyp tabylady.
