Bıýdjet týraly zań qabyldandy: eń tómengi jalaqy 110 myń teńgege deıin artady
ASTANA. KAZINFORM – Búgin Quryltaıdyń jalpy otyrysynda «2027 – 2029 jyldarǵa arnalǵan respýblıkalyq bıýdjet týraly» Zańy úshinshi oqylymda qabyldady.
Qujattyń birinshi oqylymy 2026 jyldyń 14 qazanynda ótken bolatyn.
Zańda shyǵyndardyń áleýmettik baǵyttylyǵyn saqtaýǵa erekshe nazar aýdarylady: barlyq bıýdjet qarajatynyń úshten birinen astamyn adamı kapıtaldy damytýǵa jáne azamattar aldyndaǵy áleýmettik mindettemelerdi oryndaýǵa baǵyttaý josparlanǵan. Sondaı-aq, aımaqtyq ınfraqurylymdy jańǵyrtýǵa jáne ekonomıkanyń naqty sektoryn qoldaýǵa aıtarlyqtaı resýrstar bólinedi.
Osylaısha, qabyldanǵan zań turaqty ekonomıkalyq ósý, halyqtyń ál-aýqatyn orta merzimdi perspektıvada jaqsartý jáne áleýmettik turaqtylyqty saqtaý úshin qarjylyq negiz qalyptastyrady. Munymen qosa ol bıýdjet tapshylyǵyn odan ári azaıtý jáne Qazaqstannyń qarjylyq turaqtylyǵyn nyǵaıtý úshin jaǵdaılar jasaıdy.
Qujatpen jumys isteý barysynda depýtattar 2027 jyly Prezıdenttiń tapsyrmalaryn oryndaýǵa baǵyttalǵan túzetýlerdi qoldady, sonyń ishinde:
– 114,1 mlrd teńge – Memleket basshysynyń 2026 jylǵy 28 qazandaǵy Joldaýynda jarııalanǵan bastamalaryn iske asyrýǵa, sonyń ishinde eń tómengi jalaqyny 110 myń teńgege deıin kóterýge, alǵashqy medıtsınalyq-sanıtarlyq kómek (MSAK) qyzmetkerleriniń jalaqysyn arttyrýǵa jáne orta bilim berý salasyna jasandy ıntellektti engizýge;
– 101,5 mlrd teńge – Memleket basshysynyń naqty tapsyrmalaryn oryndaýǵa, sonyń ishinde Sátpaev atyndaǵy kanaldan Astana qalasyna deıin sý qubyryn júrgizýge jáne «Balqash» AES jobasy boıynsha geologııalyq-barlaý jumystaryn júrgizýge.
Sonymen qatar, 135,5 mlrd teńge qarajat respýblıkalyq bıýdjettiń tıimdiligi men sapaly oryndalýyn qamtamasyz etý úshin memlekettik organdar arasynda ózara qaıta bólindi.
2027 jylǵy bıýdjette ınfraqurylym jobasyna qosymsha qarjy bólindi
Quryltaı depýtattarynyń bastamasymen 2027 jylǵy respýblıkalyq bıýdjette aımaqtarda 52 ınfraqurylymdyq jobany iske asyrýǵa qosymsha 47 mlrd teńge bólindi. Bul jobalardyń árqaısysy aımaqtardaǵy naqty máselelerdi sheshedi jáne qoǵamdyq kezdesýler kezinde azamattardyń bildirgen talap-tilekterine jaýap beredi.
Atap aıtqanda, depýtattar jylý jáne energetıka júıelerin jańǵyrtýdy, eldi mekenderdi gazben jáne sýmen jabdyqtaýdy, ónerkásiptik aımaqtardyń ınfraqurylymyn damytýdy, sondaı-aq mańyzdy ınfraqurylymdyq jobalardy qoldady.
Jylý, elektr energııasy jáne gaz tasymaldaý júıeleri salasyndaǵy jobalardy iske asyrýǵa 28,1 mlrd teńge qarastyryldy:
– Aqmola oblysy Qorǵaljyn aýdanynda jylý jelilerin, Kókshetaý qalasynda turmystyq jáne aýyz sýmen jabdyqtaý júıesin, káriz kollektoryn salý, Atbasar qalasynda ortalyq qazandyqty qaıta qurý josparlanyp otyr;
– Almaty oblysynda Eńbekshiqazaq aýdanynda gazben jabdyqtaý qubyryn jáne gaz taratý jelilerin salý;
– Jambyl oblysy Talas aýdanynda gaz taratý jelilerin jáne Taraz qalasynda qosalqy stantsııa salý;
– Qaraǵandy oblysynda – Aqsý-Aıýly, Erkindik, Óspen jáne Sáken Seıfýllın aýyldarynda gaz qubyry tarmaǵy men gazben jabdyqtaý jelilerin salý jáne Abaı aýdanyndaǵy magıstraldy jylý jelisiniń bir bóligin rekonstrýktsııalaý;
– Qostanaı oblysynda – Qamysty aýdanynda gaz taratý jelilerin salý, Arqalyq jáne Lısakovsk qalalaryndaǵy magıstraldy jylý jelilerin rekonstrýktsııalaý jáne t.b.
- Qyzylorda oblysynda - Jańaqorǵan aýdanyndaǵy aýyldarda, Sýnaqata, Eńbek, Ekpindi, Qojaberdi jáne Súttiqudyq eldi mekenderinde gaz qubyryn jáne qalaishilik gaz taratý jelilerin salý;
– Mańǵystaý oblysynda – Aqtaý qalasynda qazandyq salý;
– Abaı aýdanynda – Semeıdegi eki mekteptiń ortalyq jylytý pýnktin, magıstraldyq jáne blokishilik jylý jelilerin qaıta qurý jáne qýat transformatorlaryn jańǵyrtý;
– Abaı aýdanynda – Semeıdegi eki mekteptiń ortalyq jylytý qondyrǵysyn, negizgi jáne blokishilik jylý jelilerin, sonyń ishinde «Qýanysh» balabaqshasynan Máńgilik El kóshesine deıingi jylý jelilerin rekonstrýktsııalaý, úı ishilik qondyrǵylardy aýystyrý jáne qýat transformatorlaryn jańǵyrtý;
– Soltústik Qazaqstan oblysynda - Ǵabıt Músirepov aýdanyndaǵy Novoıshımskoe aýylynda magıstraldyq taratýshy jylýmen jabdyqtaý jelilerin salý, Ýálıhanov jáne Aqjar aýdandarynda joǵary voltty saqınaly jelini salý;
– Shyǵys Qazaqstan oblysynda – Óskemen qalasyndaǵy qazandyqty qaıta qurý;
– Jetisý oblysyndaǵy Tekeli qalasyndaǵy jylý jelilerin qaıta qurý jáne Ulytaý oblysynda gaz qubyry tarmaǵy men Atasý avtomattandyrylǵan gaz taratý stantsııasyn salý.
Atyraý oblysyndaǵy ózen jaǵalaýyn nyǵaıtý jumystaryna qosymsha 2,5 mlrd teńge bólinedi. Bul qarajat Alǵa aýylyndaǵy Jaıyq ózenindegi, sondaı-aq Mahambet aýdanyndaǵy Mahambet, Beıbarys jáne Taldykól aýyldaryndaǵy Jaıyq ózenindegi eldi mekenderdi sý tasqynynan qorǵaýǵa arnalǵan.
Qostanaı, Túrkistan jáne Ulytaý oblystarynda sýmen jabdyqtaý júıelerin damytýǵa 4,9 mlrd teńge qaraldy.
Sonymen qatar Pavlodar áýejaıynyń termınal ǵımaraty men nysandaryn qaıta jańartýǵa, sondaı-aq Shymkentte aýysymyna 500 kelýshi qabyldaı alatyn qalalyq emhana qurylysyna 2,5 mıllıard teńge baǵyttalady. Aqtóbe, Jetisý jáne Batys Qazaqstan oblystaryndaǵy jobalardy memlekettik qoldaýǵa qosymsha 6,5 mlrd teńge qaralǵan.
Buǵan deıin keler jyly Qazaqstan ekonomıkasy qanshalyqty ósýi múmkin ekenin jazǵan edik.