Bıýdjet tapshylyǵyn qysqartý jospary qabyldanbaǵan — Smaıylov
ASTANA. KAZINFORM — 2025 jyly bıýdjet túsimderi 335 mlrd teńgege oryndalmady. Bul týraly Májilistiń jalpy otyrysynda 2025 jylǵy respýblıkalyq bıýdjettiń atqarylýy týraly esep bergen Joǵary aýdıtorlyq palatanyń tóraǵasy Álıhan Smaıylov aıtty.
— Jalpy ishki ónim boıynsha boljamnyń 9 trln teńgege asyra oryndalǵanyna qaramastan, bıýdjet túsimderi 335 mlrd teńgege oryndalmady. Bunyń bári josparlaýdaǵy kemshilikter men salyqtyq túsimderdi shamadan tys optımızmmen boljaý saldarynan oryn alyp otyr. Kiristerdi josparlaý kezeńinde olardy boljaý ádistemesiniń saqtalmaıtynyn budan buryn atap ótken bolatynbyz. Asyra kórsetilgen parametrler jáne ádistemede kózdelmegen qosymsha túsimder qarastyrylǵan, — dedi Álıhan Smaıylov.
Onyń paıymynsha, boljamdardy shamadan tys qalyptastyrý aldaǵy kezeńdegi salyq bazasynyń kemýine ákeledi.
— Bizdiń baǵalaýymyzsha, 2026 jylǵy tólemderdiń 154 mlrd teńgesi 2025 jyly tartyldy jáne shamamen 900 mlrd teńgege qosylǵan qun salyǵy qaıtarylmaǵan. Alaıda, bul bıýdjettiń kiristeriniń jáne shyǵystarynyń teńgerimdiligin qamtamasyz etpedi. 2025 jyldyń qorytyndysy boıynsha 244 mlrd teńgege josparlanǵan qarjy bólinbedi, sondaı-aq edáýir kredıtorlyq bereshek qalyptasty. Bıýdjet tapshylyq máselesi áli de mańyzdy. Ony qysqartý boıynsha josparlar qabyldanǵan. Degemen, Joǵary aýdıtorlyq palatanyń baǵalaýynsha, olardyń orta merzimdi perspektıvada iske asyrylýy ekitalaı, — dedi palata tóraǵasy.
Aıta keteıik, Májilistiń jalpy otyrysynda QR Úkimetiniń jáne Joǵary aýdıtorlyq palatanyń 2025 jylǵy respýblıkalyq bıýdjettiń atqarylýy týraly esepteri talqylanyp jatyr.
