Bıýdjet tapshylyǵy jańa Salyq kodeksi esebinen ótele me – Mınıstrlik jaýaby

ASTANA. KAZINFORM – Ulttyq qordan qarajat alý birtindep azaıtylady. Bul týraly Qarjy vıtse-mınıstri Erjan Birjanov aıtyp berdi.

– Úkimet 2028 jylǵa deıin 22,9 trln teńge kiris kirgizip, 27,3 trln teńge shyǵyndamaq. Ortadaǵy 4,4 trln defıtsıtti bılik 2026 jyldyń 1 qańtarynda kúshine enetin jańa Salyq kodeksi esebinen toltyra ma álde taǵy da qaryz aqsha ala ma? – dep suraq qoıdy tilshiler Úkimette ótken baspasóz máslıhatynda.

Vıtse-mınıstr qazirgi tańda kiris pen shyǵys balansy sáıkes kelmeı turǵanyn, jasalyp jatqan salyq reformalarynyń bir sebebi osy alshaqtyqty azaıtý ekenin jasyrmady.

– Budan bólek, shyǵyndardy azaıtý jumystaryn da júrgizip jatyrmyz. Bul alshaqtyq osy salyq túsimderi arqyly, ishki rezerv arqyly iske asyrylady. Ekinshiden, qaryz alý protsesterimen bıýdjetti jabý da bizde kózdelgen. Biraq aıta ketetin jaǵdaı, Ulttyq qordan tólemderdi alý azaıtylady. Ózderińiz bilesizder, kelesi jyldan bastap, Ulttyq qorǵa baılanysty bolýdy azaıtyp jatyrmyz. Іshki rezervter eń aldymen bastapqy salyqtyq tólemderdi ulǵaıtý arqyly tolyǵady. Sondyqtan QQS bolsyn, basqa da ózgeristerge baılanysty qosymsha túsimderdi boljap otyrmyz, – dedi Erjan Birjanov.

Buǵan deıin Erjan Birjanov jańa Salyq kodeksi turǵyn úı baǵasyna áser etpeıtinin aıtqan edi.

Sondaı-aq, Qazaqstanda 45 myń azamattyń 180 mlrd teńge qaryzy keshirilgen.