Bıýdjet shyǵynyn qatań baqylaýda ustaý mańyzdy — Premer-mınıstr
ASTANA. KAZINFORM — Úkimet basshysy Oljas Bektenov memlekettik bıýdjet shyǵynyn qatań baqylaýda ustaýdy tapsyrdy.
— Jalpy sıpattaǵy transfert kólemi óńirlik standarttar júıesine sáıkes, óńirlerge bazalyq ınfraqurylymdyq jaǵdaıdy qamtamasyz etip otyr. Prezıdent tapsyrmasyna sáıkes, bıýdjet áleýmettik máselelerge baǵdarlanǵan bolyp qalady. Sonymen qatar ekonomıkanyń ósýin yntalandyrýǵa baǵyttalǵan shyǵys ta ulǵaımaq. Salystyrmaly túrde bıylǵa qaraǵanda keler jylǵy shyǵys shamamen 11%-dan 16%-ǵa deıin ósip otyr. Bul óz kezeginde jalpy el úshin mańyzy bar ınfraqurylymdyq jobalar, bıznesti yntalandyrý men memlekettik qoldaý sharalarynan turady, — dedi Oljas Bektenov Úkimet otyrysynda.
Premer-mınıstrdiń sózinshe, joǵaryda atalǵan shyǵys óńirlerdiń damýyna jáne halyqtyń ómir súrý sapasyn jaqsartýǵa oń áserin tıgizedi.
— Respýblıkalyq bıýdjet jobasy men jalpy sıpattaǵy transfertti qalyptastyrý barysynda jańa Bıýdjet jáne Salyq kodeksi eskerildi. Barlyq memlekettik organǵa eldiń áleýmettik-ekonomıkalyq damýdyń belgilengen parametrlerge qol jetkizýdi qamtamasyz etýdi tapsyramyn. Bıýdjet qarajatyn barynsha tıimdi jáne ýaqtyly paıdalaný, sondaı-aq shyǵyndy qatań baqylaýda ustaý mańyzdy, — deıdi ol.
Buǵan deıin Úkimet 2026-2028 jyldarǵa arnalǵan áleýmettik-ekonomıkalyq damý boljamyn jáne 2035 jylǵa deıingi uzaq merzimdi damý boljamyn maquldady.
Sondaı-aq Úkimettiń jalpy ishki ónim, ınflıatsııa, ulttyq qor, bıýdjetti toltyrý boıynsha 2026-2028 jyldarǵa arnalǵan ekonomıkalyq boljamy týraly jazǵan edik.