Bıýdjet kirisiniń tómendeýi jyldar boıy jalǵasyp keledi – Májilis tóraǵasy
ASTANA. KAZINFORM – Májilis spıkeri Erlan Qoshanov respýblıkalyq bıýdjettiń kiris bóligin qalyptastyrýda qıyndyqtar baryn aıtyp, Úkimetke birqatar mindet júktedi.
«Depýtattar bıýdjet jobasymen jumys barysynda birqatar júıelik kemshilikti anyqtady. Ol týraly búgin aıtyldy. Eń aldymen, bıýdjettiń kiris bóligin qalyptastyrýǵa qatysty. Qıyndyqtar bar ekeni anyq. Atap aıtqanda, eksporttyq taýarlardyń baǵasy turaqsyzdanyp, álemdik naryqtyń ózgerýine táýeldi bolyp otyr. Osyǵan baılanysty bıýdjet kiristeriniń tómendeýi birneshe jyldan beri jalǵasyp keledi», - dedi Erlan Qoshanov Májilistiń jalpy otyrysynda 2025-2027 jyldarǵa arnalǵan respýblıkalyq bıýdjetti talqylaýdy qorytyndylaı otyryp.
Sondaı-aq, Májilis Memleket basshysynyń qosymsha kiris kózderin tabý qajettigi týraly tapsyrmasyn eske saldy.
Onyń aıtýynsha, Úkimet tarapynan kiristerdi qalpyna keltirý jáne bıýdjetti uzaq merzimdi turaqtandyrý boıynsha pármendi áreketter joq.
«Bul depýtattar arasynda úlken alańdaýshylyq týǵyzyp otyr, búgin Úkimet basshysy men múshelerine biraz suraq qoıyldy. Halyq tabysyn arttyrýǵa jáne ekonomıkany ósirýge degen Úkimettiń talpynysy óz jemisin beredi dep úmittenemiz. Óńdeýshi ónerkásiptiń údemeli ósýi jónindegi boljamda jalań tsıfrlardy qýalaı bermeı, jańa ekonomıkalyq saıasatty belsendi iske asyrý qajet, ıaǵnı naqty nátıje kerek. Jańadan óndirister ashý jáne olardy damytý Úkimet jumysynyń negizgi basymdyǵy bolýǵa tıis. Sonda ǵana biz el bıýdjeti kiristeriniń aıqyn ósimin kóremiz», - deıdi ol.
Aıta keteıik, búgin Májilistiń jalpy otyrysynda «2025 – 2027 jyldarǵa arnalǵan respýblıkalyq bıýdjet týraly» Zańy qabyldandy.
