Bıýdjet kodeksiniń jańa erejeleri óńirlerdiń qarjylyq derbestigine tusaý bolmaýy tıis — Prezıdent
ASTANA. KAZINFORM — Úkimet aımaqtardyń qarjylyq ornyqtylyǵyn nyǵaıtý sharalaryn qabyldaýǵa mindetti. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.
— Aımaqtardaǵy bıýdjettik josparlaýdy sapaly júrgizýge basa mán berý qajet. Ózderińizge málim, sońǵy jyldary aımaqtardyń kiris qory aıtarlyqtaı artty, birqatar salyq pen tólem túrleri respýblıkalyq deńgeıden aımaqqa berildi. Sonyń saldarynan jetkilikti qarjy bólmeı, jergilikti bıýdjetke qosymsha shyǵyndardy artyp qoıý jaǵdaılary jıilep ketti. Mundaı tájirıbe bıýdjetaralyq qatynastardyń qısynyna qaıshy ári qabyldanyp jatqan sheshimderge senimdi joǵaltady, — dedi Qasym-Jomart Toqaev.
Sondyqtan Memleket basshysy jergilikti atqarýshy organdarǵa beriletin qarjy resýrstary men olardyń mindettemeleri bir-birimen mólsherles bolýyn eskerý óte mańyzdy ekenin aıtty.
— Qazaqstan — bir ortalyqtan basqarylatyn ýnıtarly, birtutas el. Sol sebepti elimizdiń áleýetin nyǵaıtýdy, halqymyzdyń ál-aýqatyn arttyrýdy basty maqsat etip, aqyl-parasatpen, bir qoldyń salasyndaı jumylyp jumys isteý qajet. Jańa Bıýdjet kodeksinde bıýdjetaralyq qatynastar naqtylyq jáne barlyq bıýdjet deńgeıindegi jaýapkershilik turǵysynan qaıta qaraldy. Endi osy normalar óńirlerde is júzinde qalaı jumys isteıtinin baıqap kórý kerek. Eger qoldanystaǵy quraldar tıimsiz ekenin kórsetse, ony túzetý qajet. Bul jerde eshqandaı kúmán joq. Sheshimdi tez ári batyl qabyldaý qajet, — dedi Prezıdent.
Qasym-Jomart Toqaevtyń aıtýynsha, jańa erejeler óńirlerdiń qarjylyq derbestigine tusaý bolmaýy tıis.
— Eń bastysy, olardyń kiris kózderin ulǵaıtýǵa degen ynta-jigerine keri áser etpeýi kerek. Úkimet aımaqtardyń qarjylyq ornyqtylyǵyn nyǵaıtý sharalaryn qabyldaýǵa mindetti. Bul — strategııalyq sıpaty bar maqsat. Basqarýdyń túrli deńgeıi arasyndaǵy jaýapkershilikke salǵyrt qaraýǵa bolmaıdy, — dediń Memleket basshysy.
Buǵan deıin Qasym-Jomart Toqaev Úkimettiń aldyndaǵy negizgi mindetti atady.
