Bıýdjet kodeksine salyqtyq boljaýdyń qandaı jańa mehanızmderi engizildi
ASTANA. KAZINFORM – Joǵary aýdıtorlyq palatanyń usynycymen salyqtyq boljaýdyń jańa mehanızmderi qabyldandy. Bul týraly palatanyń baspasóz qyzmeti málim etti.
Memleket salyqtyq boljaý jáne ákimshilendirý salasyndaǵy tásilderdi jetildirdi. Joǵary aýdıtorlyq palatanyń usynymy eskerilip, bul ózgerister jańa Bıýdjet kodeksine engizildi.
— Joǵary aýdıtorlyq palata salyq jáne keden júıelerine júrgizilgen aýdıt qorytyndysy boıynsha Úkimetke jańa Bıýdjet kodeksinde «salyqtyq áleýet» jáne «salyqtyq alshaqtyq» uǵymdaryn bekitýdi, sondaı-aq salalyq memlekettik organdardyń qoldanýyn reglamentteýdi usyndy. Nátıjesinde bul usynymdar Memleket basshysy 2025 jyly 15 naýryzda qol qoıǵan jańa Bıýdjet kodeksine endi, — delingen habarlamada.
Mynadaı jańa uǵymdar engizildi:
«Salyqtyq áleýet» — salyqtyq shyǵystar men qadaǵalanbaıtyn ekonomıkany qosa alǵanda, salyq jáne bıýdjetke tólenetin basqa da mindetti tólemder túsimderiniń yqtımal somasy;
«Salyqtyq alshaqtyq» — salyqtyq áleýet pen naqty túsken salyqtar arasyndaǵy aıyrma.
Salyqtyq alshaqtyq esepti qarjy jylynyń qorytyndysy boıynsha Ulttyq statıstıka bıýrosynyń saıtynda túpkilikti makroekonomıkalyq kórsetkishter (jalpy ishki ónim, jalpy qosylǵan qun, baqylanbaıtyn ekonomıka jáne t. b.) jarııalanǵannan keıin esepteledi. Ol kóleńkeli ekonomıka jáne jeńildikter berý esebinen salyqtardyń tolyq túspeýin de qamtıdy.
Salyqtyq alshaqtyq týraly málimetter Salyqtyq shyǵystar týraly taldamalyq esepke engiziledi.
— Jańa Bıýdjet kodeksinde bıýdjettiń kiris bóligin josparlaý sapasyn jaqsartýǵa, bıýdjet protsesterin ońtaılandyrýǵa, parlamenttik baqylaýdy kúsheıtýge, Ulttyq qor qarajatyn paıdalanýdyń tıimdiligin arttyrýǵa jáne t. b. baǵyttalǵan jeti túzetý blogy kózdelgenin eske salamyz, — dep jazdy Joǵary aýdıtorlyq palata.
Aıta keteıik, buǵan deıin 205 «jaıly mekteptiń» quny 250 mlrd teńgege qymbattap shyǵa kelgenin jazǵan edik.