Bıýdjet qarjysyn jymqyrǵan Qaraǵandy oblysy ákiminiń burynǵy orynbasary óz kinásin moıyndady
Qaraǵandy qalasynyń Qazybek bı aýdandyq sotynyń óndirisine oblys ákiminiń burynǵy orynbasary Jandos Ábishev pen onyń aǵasyna qatysty qylmystyq is kelip tústi. Aıyptalýshylar kinásin moıyndaý týraly is júrgizý kelisimin jasaǵan.
Sot materıaldaryna sáıkes, Qaraǵandy oblysy ákiminiń áleýmettik máseleler jónindegi burynǵy orynbasary Jandos Ábishevke QR QK-niń 364-babynyń 3-bóligi boıynsha «Jaýapty memlekettik laýazymdy atqaratyn tulǵanyń kásipkerlik qyzmetke zańsyz qatysýy» degen aıyp taǵyldy. Burynǵy sheneýnik qazirgi tańda qamaýda.
«Protsessýaldyq kelisimmen kináni moıyndaý týraly mámile túrinde kelip túsken qylmystyq is óndiriske qabyldandy. Aldyn ala tyńdaý 9 tamyzǵa belgilendi», - dep habarlady Qazybek bı aýdandyq sotynda.
Eske sala keteıik, bıyl aqpan aıynda Sybaılas jemqorlyqqa qarsy is-qımyl jónindegi ulttyq bıýro Qaraǵandy oblysy ákiminiń burynǵy orynbasaryna qatysty sotqa deıingi tergeýdi bastady.
«Sybaılas jemqorlyqqa qarsy kúres Ulttyq bıýrosy Qaraǵandy oblysy ákiminiń burynǵy orynbasaryna qatysty sotqa deıingi tergeý amaldaryn júrgizýde. Ol oblystyń jumyspen qamtý jáne áleýmettik baǵdarlamalardy úılestirý basqarmasynyń laýazymdy tulǵalarymen aldyn ala sóz baılasý arqyly adamdar tobynda oblystyń múmkindigi shekteýli adamdaryn arnaıy qatynas kólikterimen qamtamasyz etýge bólingen 36 mln teńgeden astam somadaǵy bıýdjet qarajatyn jymqyrdy degen kúdikke ilinip otyr», - dedi agenttikte ótken baspasóz máslıhatynda Arman Berdalın.
Onyń aıtýynsha, atap aıtqanda, tehnıkalyq sıpattamaǵa sáıkes kelmeıtin jáne kóterińki baǵada múmkindigi shekteýli adamdarǵa arnalǵan kreslo-arbalaryn jetkizý boıynsha qylmystyq is qozǵalǵan.
Eske sala ketsek, Jandos Ábishev 2014 jyldyń qyrkúıeginen
2019 jyldyń 16 qańtaryna deıin Qaraǵandy oblysy ákiminiń orynbasary qyzmetin
atqardy. Ol óńirdiń áleýmettik salasy máselelerine jetekshilik etti.