Bıýdjet qarjysyn jymqyrǵan bólim basshysy ákimniń orynbasary bolyp ketken

ASTANA. QazAqparat - Sybaılas jemqorlyqqa qarsy is-qımyl ulttyq bıýrosynyń Jambyl oblystyq departamenti Shý aýdany ákiminiń orynbasaryna qatysty tergeýdi bastady, dep xabarlaıdy QazAqparat tilshisi QR Memlekettik qyzmet isteri jáne sybaılas jemqorlyqqa qarsy is-qımyl agenttigine silteme jasap.

Qoǵammen baılanys departamentiniń dırektory Arman Berdalınniń aıtýynsha, buǵan deıin kúdikti «Shý aýdandyq ákimdiginiń bilim bólimi» kommýnaldyq memlekettik mekemesiniń basshysy bolǵan. Sol kezde ol bas býxgaltermen sóz baılasyp, 2015-2017 jyldary aralyǵynda kommýnaldyq mekeme jumysshylaryna negizsiz jalaqy jazyp otyrǵan.

«Sóıtip, Qazaqstan Respýblıkasynyń bilim berýdi jáne ǵylymdy damytýdyń 2016-2019 jyldarǵa arnalǵan memlekettik baǵdarlamasyna bólingen 19,6 mıllıon teńgeniń bıýdjet qarajatyn jymqyrǵan. Tergeý sharalary jalǵasýda», - dedi A.Berdalın Astanada ótken baspasóz máslıxatynda.

Aıta keteıik, búgin agenttik Mańǵystaý oblysynyń dene shynyqtyrý jáne sport basqarmasy basshysynyń qamaýǵa alynǵanyn jarııalady. Ol memleket múddesine 1 mıllıard teńgeden astam somaǵa zalal keltirgen.

Budan bólek, aǵaıyndy Rysqalıevterdiń sybaılasy qamaýǵa alyndy.

Qyzylordada oblystyq basqarma basshysynyń orynbasary ekstremızmge qarsy sharalarǵa bólingen bıýdjet qarjysyn jymqyrǵan.

Al Stepnogorsk qalasynda qoǵamdyq densaýlyqty saqtaý basqarmasynyń basshysy paramen ustaldy.