Bıýdjet qarjysyn jymqyrdy degen aıyppen «Qorǵas» Shekaralyq yntymaqtastyq halyqaralyq ortalyǵy» AQ prezıdenti ustaldy
ASTANA. Qazannyń 28-i. QazAqparat /Aıdar Ospanalıev/ - «Qorǵas» Shekaralyq yntymaqtastyq halyqaralyq ortalyǵy» AQ-nyń prezıdenti N.Seıidáli men onyń enshiles kásiporny «Qorǵas-servıs» JShS-niń basshysy E.Rahymbaev tutqyndaldy.
Bul týraly búgin Astanadaǵy brıfıngte Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı málim etti.
Onyń málimetterine qaraǵanda, atalǵan azamattar jaýapkershiligi shekteýli seriktestiktiń jarǵy kapıtalyn kóteremiz degen jeleýmen jalǵan kásiporyndar arqyly 190 mıllıon teńge bıýdjet qarjysyn jymqyrǵan. «Sondaı-aq Almatydaǵy halyqaralyq áýejaıdyń burynǵy prezıdenti Ydyrysov ta qylmystyq jaýapqa tartylýda. Oǵan jalǵan kásipkerlik arqyly jańa jolaýshylar termınalyn salýǵa bólingen qarjynyń 570 mıllıonnan astam qarjysyn jymqyrdy degen aıyp taǵylyp otyr», - dedi M.Jumanbaı.
Onyń aıtýynsha, elimizde bıylǵy jyldyń 9 aıynda jalǵan kásipkerlikpen aınalysyp júrgen 56 adamnan turatyn 43 qylmystyq top ustalǵan.
