Bıýdjet qarjysyn urlaǵan Qaraǵandy oblysy ákiminiń eks-orynbasary sottaldy

NUR-SULTAN. QazAqparat – Qaraǵandy oblysy ákiminiń burynǵy orynbasary J.Ábishev pen onyń inisi E.Ábishevke qatysty sotqa deıingi tergeý sharalary aıaqtaldy. Bul jaıynda QR Sybaılas jemqorlyqqa qarsy is-qımyl agenttiginen málim etti, dep habarlaıdy QazAqparat tilshisi.

Vedomstvo málimetinshe, J.Ábishev zańdaǵy shekteýlerge qaramastan inisi E.Ábishevtiń kompanııasyna qamqorlyq tanytý arqyly kásipkerlik qyzmetke zańsyz aralasqan. E.Ábishev Qaraǵandy oblystyq jumyspen qamtý jáne áleýmettik baǵdarlamalardy úılestirý basqarmasyna múgedekterge arnalǵan arbany jetkizip berý barysynda 101 mln teńge bıýdjet qarajatyn urlaǵan.
«Sotqa deıingi tergeý satysynda Ábishev keltirilgen zalaldy ótedi jáne prokýratýramen kinásin moıyndaý týraly mámile túrinde protsessýaldyq kelisim jasady. Osy jyldyń 5 qyrkúıeginde Qaraǵandy qalasy Qazybek bı aýdandyq sotynyń úkimimen J.Ábishevke 2 myń AEK mólsherinde aıyppul salyndy jáne ol ómir boıy memlekettik qyzmette laýazymdy qyzmet atqarý quqyǵynan aıyryldy. Onyń inisi E.Ábishev shartty túrde 5 jylǵa sottaldy», - dep atap ótti agenttik.