Bıýdjet qarjysy esebinen shetelde emdelýge kimder quqyly
«QR azamattaryn bıýdjet qarajaty esebinen shetelge emdelýge jiberý máselesin sheshý úshin respýblıkalyq densaýlyq saqtaý uıymdary jumys organynyń qaraýyna tıisti qujattardy engizedi. Jumys organy atalǵan qujattardy qarastyryp, QR azamattaryn bıýdjet qarajaty esebinen sheteldik medıtsınalyq uıymdarǵa emdelýge jiberý jónindegi komıssııanyń otyrysyna shyǵarady, sonda sheshim qabyldaıdy», - dep jaýap berdi «QazAqparat» HAA tilshisiniń resmı saýalyna mınıstrliktiń Medıtsınalyq kómekti uıymdastyrý departamentiniń dırektory Laýra Ahmetnııazova.
Departament dırektory sonymen qatar, bıýdjet qarajaty esebinen shetelge emdelýge jiberiletin azamattar sanatyn usyndy.
«Olar: medıtsınalyq kórsetilimderi bolǵan jáne QR densaýlyq saqtaý uıymdarynda dıagnostıka men emdeýdiń qoldanýǵa ruqsat etilgen barlyq ádisteri paıdalanylǵan, biraq emniń oń nátıjesi bolmaǵan 18 jasqa deıingi balalar. Sonymen birge, QR Prezıdentiniń, QR Premer-Mınıstriniń tapsyrmasy boıynsha erekshe jaǵdaılarda qyzmettik mindetterdi atqarý kezinde aýyr jaraqat alǵan jáne mertikken, QR densaýlyq saqtaý uıymdarynda dıagnostıka men emdeýdiń qoldanýǵa ruqsat etilgen barlyq ádisteri paıdalanylǵan, biraq emniń oń nátıjesi bolmaǵan quqyq qorǵaý organdarynyń qyzmetkerleri, QR Qarýly Kúshteriniń áskerı qyzmetshileri», - delingen jaýapta.
Mınıstrliktiń ókili shetelge emdelýge joldanǵan patsıenttiń shyǵyndary bıýdjet qarajaty esebinen óteletinin málim etti.
«Bıýdjet qarajaty esebinen shetelge emdelýge joldanatyndar - kóbine ártúrli onkologııalyq aýrýlarmen aýyratyn patsıentter», - deıdi Laýra Ahmetnııazova.
Mınıstrlik ókiliniń jaýabyna sáıkes, Almaty jáne Astana qalasy, Shyǵys Qazaqstan jáne Almaty oblysynan naýqastar shetelde emdelýge kóbirek ótinim beredi.
Buǵan deıin habarlaǵanymyzdaı, 2018 jyly bıýdjet qarajaty esebinen Qazaqstan azamattaryn shetelge emdeýge jiberý úshin 1,6 mlrd teńge bólindi (2017 jyly - 1,59 mlrd teńge).