Bıýdjet qarjysy esebinen Qazaqstannyń memlekettik qoryna 166,7 myń tonna astyq satyp alynady - QR AShM

ASTANA. 8 qazan. QazAqparat - Aǵymdaǵy jyly bıýdjet qarjysy esebinen Qazaqstannyń memlekettik qoryna 166,7 myń tonna astyq satyp alynady. Bul týraly búgin QR Aýyl sharýashylyǵy mınıstrligi Egin sharýashylyǵy departamentiniń dırektory Anna Býts málim etti.

«Qazirgi tańda Úkimette «Azyq-túlik kelisimshart korporatsııasy» UK» AQ satyp alatyn azyqtyq bıdaı baǵasy QQS tóleýshiler úshin tonnasy 28 myń, al QQS tólemeıtinder úshin 25 myń teńge deńgeıinde belgilendi. Sondyqtan bıýdjet qarjysy esebinen atalǵan baǵamen 166,7 myń tonna bıdaı satyp alynatyn bolady», - dedi A.Býts.

Onyń atap ótýinshe, 2013 jyldyń óniminen memlekettik qorǵa astyq satyp alý memlekettik qordy jartylaı jańartý, azyq-túlik qaýipsizdigin qamtamasyz etý, astyq qoryn jedel retteý maqsattarynda júzege asyrylady.

«Qazirgi ýaqytta Úkimettiń memlekettik qorǵa jetkiziletin astyqty satyp alý baǵasyn belgileý boıynsha qaýlysynyń jobasy múddeli uıymdardan kelisý protsedýrasynan ótýde», - dedi ol.