Bıýdjet qarjysyna satyp alynǵan bir sotyq jer de jekemenshikke ótpeıdi – Erbolat Dosaev

ALMATY. KAZINFORM — Almaty ákimi Erbolat Dosaev Medeý aýdany turǵyndarymen kezdesý barysynda memlekettik qajettilik úshin jerdi satyp alý tetigin túsindirdi.

— Jer ýchaskesin satyp alý úshin beriletin ótemaqy somasy halyqtyń barlyq qajettiligin qanaǵattandyrýǵa jetkiliksiz dep aıtylyp jatyr. Baǵalaýdyń zańnamamen belgilengen naqty mehanızmderi bar, biraq eger sot zańǵa sáıkes kóbirek ótemaqy taǵaıyndasa, ol tólenedi. Qajetti qarajatty tabamyz, únemdeımiz. Eń bastysy, qala damýy qajet. Qala ákimi retinde mende shahardy damytý úshin jetkilikti memlekettik jer qory joq, – dedi Erbolat Dosaev Medeý aýdany turǵyndarymen kezdesýde.

Qala basshysy 2022 jyly taǵaıyndalǵannan beri ákimdik jerdi jol salý, áleýmettik ınfraqurylym men qoǵamdyq keńistikterdi damytý maqsatynda ǵana satyp alyp jatqanyn jáne munyń bári zań aıasynda júzege asyrylyp otyrǵanyn atap ótti.

– Bıýdjet qarajatyna satyp alynǵan bir sotyq jerdi de Jer kodeksine sáıkes jekemenshikke bere almaımyz. Bul máseleni birden naqtylap aıtqym keledi, ákimdik jerdi satyp alyp, ony bireýge bere alady degen oı bolmaýy kerek. Bul Jer kodeksi boıynsha qatań túrde tyıym salynǵan, bizde mundaı áreketke barýǵa quqyǵymyz joq, – dedi qala ákimi.

Osyǵan deıin qala turǵyny Medeý aýdanynda qurylysy josparlanǵan kongress-ortalyqtyń qurylysy qanshalyqty zańdy ekenin suraǵan edi. 

Sonymen qatar, áleýmettik jelide osy jer ýchaskesinde úlken keńse ǵımaraty salynatyny týraly aqparat paıda boldy. 

Erbolat Dosaev kongress-ortalyq úshin alynatyn aýmaqta eshqandaı kommertsııalyq nysan salynbaıtynyn jetkizdi.