SQO-da bıýdjet qarjysynyń ıgerilmeýine bes sebep bar
PETROPAVL. KAZINFORM — Soltústik Qazaqstan oblysynda ótken segiz aıda bıýdjet 99% oryndaldy. Alaıda ıgerilmeı qalǵan qarajat 2,6 mlrd teńgeden asty.
SQO qarjy basqarmasynyń málimetinshe, jergilikti bıýdjet 99,6%, al respýblıkalyq bıýdjet qarajaty 94,3% deńgeıinde oryndalǵan. Igerilmegen qarjynyń basym bóligi Petropavl qalasyna tıesili.
— Oblys ortalyǵynda 1,827 mlrd teńge ıgerilmegen. Onyń 647,9 mln teńgesi memlekettik satyp alý portalyndaǵy tehnıkalyq máselelerge baılanysty sharttarǵa qol qoıylmaýy saldarynan keshiktirildi. Oblystyq bıýdjet qarajatynyń ýaqtyly ıgerilmeýine birneshe faktor áser etedi. Olardyń qatarynda nysanaly transfertterdiń kesh aýdarylýy, kommýnaldyq qyzmetterge kórsetilgen qyzmet boıynsha tólemderdiń keıin júrgizilýi, taýarlardy ýaqytyly jetkizbeý jáne jumystar men qyzmet kórsetý kestesinen artta qalý bar. Sondaı-aq oryndalǵan jumystar aktileri men shot-faktýralardyń ýaqytyly usynylmaýy da bıýdjet qarajatynyń ıgerilý merzimine áser etedi, — deıdi SQO Qarjy basqarmasynyń basshysy Qýanyshbek Qalıjanov.
2025 jyldyń qorytyndysy boıynsha SQO bıýdjeti 99,4% oryndalǵan. Saldarynan jyl sońynda 3 mlrd 219,3 mln teńge ıgerilmeı qalǵan. Onyń ishinde nysanaly transfertter men kredıtter boıynsha ıgerilmegen qarajat mólsheri 2 mlrd 162 mln teńge bolǵan. Bul somanyń 2 mlrd teńgesi respýblıkalyq bıýdjetten kredıtterdiń aýdarylmaýyna baılanysty qalyptasqan.
2025 jyly respýblıkalyq bıýdjetke qaıtarylǵan nysanaly transfertter somasy 156 mln teńge boldy.
— Bıyl oblysta birqatar iri áleýmettik jáne ınfraqurylymdyq jobalar júzege asyrylyp jatyr. Bul jobalardy qarjylandyrýda kidiris joq. Olardyń qatarynda Qyzyljar aýdanynyń Beskól aýylynda bir aýysymda 250 adam qabyldaıtyn emhana qurylysy bar. Sonymen birge oblystyq mańyzy bar KT-85 Prıbrejnoe eldi mekenine barar joldyń 0–2,12 shaqyrym ýchaskesin, onyń ishinde kópir salý arqyly rekonstrýktsııalaý jobasy jáne Petropavlda Sh. Ýálıhanov-Chkalov kósheleri qıylysynda 280 oryndyq balabaqsha qurylysy júrip jatyr, — deıdi Qýanyshbek Qalıjanov.
Buǵan deıin SQO-da qurylys kezinde 380 mln teńge bıýdjet qarajatyn jymqyrý deregi anyqtalǵanyn jazǵan edik.
