Bıýdjet qarajatynyń ıgerilmeý sebepteri ataldy

ASTANA. QazAqparat – 10 aıda respýblıkalyq bıýdjettiń shyǵysyna bólingen qarajattan 278 mlrd ıgerilmegen. QR Premer-mınıstriniń orynbasary – Qarjy mınıstri Erulan Jamaýbaev Úkimet otyrysynda bıýdjet ıgerýde sylbyrlyq tanytqan salalardy atady, dep habarlaıdy QazAqparat tilshisi.

«Memlekettik bıýdjettiń shyǵystary 96,7%, respýblıkalyq bıýdjettiń shyǵystary – 98%, jergilikti bıýdjetterdiń shyǵystary 94% atqaryldy. Respýblıkalyq bıýdjet boıynsha 14,5 trln teńge somasyna shyǵystar júrgizildi. Bıýdjettiń oryndalmaýy 295 mlrd teńgeni qurady, onyń ishinde 17 mlrd teńge – únemdeý. Igerilmegeni – 278 mlrd teńge. Eń kóp ıgerilmeý somasy ındýstrııa jáne ınfraqurylymdyq damý, ishki ister, tótenshe jaǵdaılar jáne Oqý-aǵartý mınıstrlikterinde qalyptasty», - dedi vıtse-premer.

Sondaı-aq ol bıýdjetti ıgermeýdiń negizgi sebepterine toqtaldy.

«Igerilmeýdiń negizgi sebepteri: qazynashylyq aqparattyq júıelerindegi tehnıkalyq aqaýlar, konkýrstyq rásimderdi uzaq ótkizý, oryndalǵan jumystar aktilerin, shot – faktýralardy ýaqtyly usynbaý, sharttardy, qosymsha kelisimderdi uzaq jasasý jáne t.b. bolyp tabylady», -dedi Erulan Jamaýbaev.