Bıýdjet qarajaty esebinen qazaq tilinde jaryq kórgen 72 oqýlyq tanystyrylady
ASTANA. 19 qazan. QazAqparat - Erteń Almatydaǵy Qazaq ulttyq agrarlyq ýnıversıtette Qazaqstan joǵarǵy oqý oryndaryn kitapppen qamtamasyz etý máseleleri boıynsha VI Respýblıkalyq konferentsııa óz jumysyn bastaıdy.
Konferentsııada joǵarǵy oqý oryndaryna arnalǵan respýblıkalyq bıýdjettiń qarjylandyrýymen jaryq kórgen memlekettik tildegi 72 oqýlyqty tanystyrý rásimi bolady, dep habarlady QR Bilim jáne ǵylym mınıstrliginiń baspasóz qyzmetinen.
Májilisti QR Bilim jáne ǵylym mınıstri Bahytjan Jumaǵulov ashady. QR Bilim jáne ǵylym mınıstrligi joǵarǵy oqý oryndaryna arnalǵan oqýlyqtardy, birinshi kezekte memlekettik tildegi oqýlyqtardy daıyndaý jáne shyǵarýǵa memleket tarapynan júıeli túrde qoldaý kórsetip keledi. Alǵashqy ret respýblıkalyq bıýdjetten bólingen 137,7 mln. teńge 130 túrli oqýlyqty qarjylandyrýǵa jumsalyp otyr.
Konferentsııa aıasynda tehnıkalyq, jaratylystaný, ekonomıka mamandyqtary boıynsha joǵarǵy oqý oryndaryna arnalǵan, respýblıkalyq bıýdjettiń qarjylandyrylýymen jaryq kórgen memlekettik tildegi 72 oqýlyqty tanystyrý ótedi. Sonymen qatar, QR JOO qaýymdastyǵy men joǵarǵy oqý oryndary jaryqqa shyǵarǵan oqýlyqtar kórmesi bolady.
Búgingi tańda JOO qaýymdastyǵynyń baspa ortalyǵy memlekettik tilde 72 negizgi oqýlyqty jaryqqa shyǵardy. Qalǵan oqýlyqtar jaryqqa shyǵarylyp, respýblıkanyń oqý oryndaryna osy jyldyń aıaǵyna deıin úlestiriledi. Jaryqqa shyǵarylýy josparlanǵan jáne shyǵarylǵan oqýlyqtardyń taralymy 160 myń danany quraıdy.
Jalpy otyrysta Bilim jáne ǵylym mınıstrligi QR Ulttyq kitaphanasynyń qoryna, Ortalyq ǵylymı kitaphanaǵa, joǵarǵy oqý oryndaryndaǵy ǵylymı kitaphanalarǵa JOO-ǵa arnalǵan memlekettik tildegi jańa 72 oqýlyq sertıfıkattaryn tabystaıtyn bolady.
