Bıýdjet qarajatyn tıimsiz paıdalaný: Parlament úkimettiń esebin qaraıdy
ASTANA. KAZINFORM – Parlament Májilisi Qazaqstan Úkimetiniń jáne QR Joǵary aýdıtorlyq palatasynyń 2024 jylǵy respýblıkalyq bıýdjettiń atqarylýy týraly esepterin talqylaıdy.
«Qazaqstan Parlamentiniń qaraýyna QR Úkimeti jáne QR Joǵary aýdıtorlyq palatasy 2024 jylǵy respýblıkalyq bıýdjettiń atqarylýy týraly esepterin engizdi. Aldyn ala baǵalaý boıynsha 2024 jyly JІÓ ósimi 4,8% qurady, bul eldiń áleýmettik-ekonomıkalyq damýynyń bekitilgen boljamynan 0,5 paıyzdyq tarmaqqa tómen.
Úkimettiń málimetinshe, byltyr respýblıkalyq bıýdjettiń kirisi 19,6 trln teńgeni nemese jospardyń 97,2%-yn, shyǵystar 23 trln teńgeni nemese jospardyń 98,4%-yn, al tapshylyq 3,6 trln teńgeni nemese jalpy ishki ónimniń 2,7%-yn qurady. 2024 jyly Ulttyq qorǵa kelip túsken qarajat 3,8 trln teńgeni nemese jospardyń 85 paıyzyn qurady.
Joǵary aýdıtorlyq palatanyń derekterine qaraǵanda, 2024 jyly talaptardy buzý 862 mlrd teńge somasynda anyqtalǵan, sonymen birge bıýdjet qarajaty men aktıvterin tıimsiz paıdalaný kólemi eki esege jýyq ósken», - dedi Májilistiń Qarjy jáne bıýdjet komıtetiniń tóraıymy, depýtat Tatıana Saveleva.
Osy oraıda ol Májilistiń Qarjy jáne bıýdjet komıteti Úkimettiń jáne Joǵary aýdıtorlyq palatasynyń esepteri boıynsha qorytyndy ázirleýge daıyn ekenin aıtty.
Budan buryn habarlanǵandaı, Joǵary aýdıtorlyq palatanyń nusqamasy boıynsha jylýmen, sýmen jabdyqtaý jáne sý burý júıeleriniń qurylysyn jańǵyrtý kezindegi bıýdjet qarajatyn utymsyz jumsaý toqtatyldy.