Bıýdjet qarajatyn tıimsiz paıdalaný máselesi: 73 laýazymdy adam jazalandy

ASTANA. KAZINFORM — Byltyr bıýdjet qarajatyn tıimsiz paıdalaný somasy 371 mlrd teńgeni qurady. Bul týraly Parlament Májilisinde 2024 jylǵy bıýdjettiń atqarylýy týraly Úkimet esebin tanystyrý kezinde Qarjy vıtse-mınıstri Dáýren Temirbekov málim etti.

— 2024 jyly Ulttyq qordyń qarajatyn basqarý tıimdiligi boıynsha oń ózgerister baıqaldy. Máselen, Ulttyq qordyń aktıvteri onyń aldyndaǵy jylmen salystyrǵanda 16%-ǵa ulǵaıyp, 34,7 trln teńgeni qurady. Kepildendirilgen transfert 2022 jylǵy 4 trln teńgeden 2024 jyly 2 trln teńgege deıin tómendedi. 2024 jyly «Ulttyq qor — balalarǵa» baǵdarlamasy boıynsha 1 balaǵa eseptelgen soma 129 dollar 38 tsentti qurady. Eki jyl ishinde baǵdarlama boıynsha esepteý 232 dollar 94 tsent boldy, — dedi D. Temirbekov.

Onyń aıtýynsha, 2024 jyly bıýdjet qarajatyn tıimsiz paıdalaný somasy 371 mlrd teńgeni qurady.

— Ákimshilerdiń bıýdjet qarajatynyń tıimdi jáne tolyq paıdalanylýyna jaýapkershiligin arttyrý maqsatynda 73 laýazymdy adam jaýapqa tartyldy, onyń 67-si basshylyq qyzmet atqarýshylar, — dedi vıtse-mınıstr.

Budan buryn habarlanǵandaı, Májilis tóraǵasynyń orynbasary Danııa Espaeva 2024 jyly tıimsiz paıdalanylǵan bıýdjet qarajaty men aktıvter kólemi 2 esege jýyq óskenin aıtty.