Bıýdjet qarajaty forýmdar men semınarlarǵa jumsalmaıdy – Qarjy mınıstrligi
ASTANA. KAZINFORM — Qarjy vıtse-mınıstri Abzal Beısenbekuly úsh jyldyq bıýdjetten qandaı tıimsiz shyǵystar joıylǵanyn aıtyp berdi.
— Keıingi jyldary forýmdar men semınarlarǵa jumsalatyn shyǵyndar qarastyrylmaǵanyn baıqaýǵa bolady, - dedi A. Beısenbekuly Quryltaıda tilshiler suraǵyna jaýap bere otyryp.
Sonymen qatar, bıýdjette memlekettik organdar qyzmetkerlerine arnalǵan jekelegen keńse taýarlaryna qarajat qarastyrylmaǵan.
Bul rette ol tıisti ózgerister jańa Bıýdjet kodeksine sáıkes engizilgenin aıtty.
— Keńse taýarlarymen tolyq qamtamasyz etýge qatysty qanshama eleýli qujat aınalymy kerek. Sondyqtan tıisti normatıvti bekittik. Ár adamǵa naqty ne qajet ekenin eseptep, shekti mólsherdi belgiledik. Belgilengen normatıv aıasynda bir adamǵa 8 AEK mólsherinde aıqyndaldy, — dep túsindirdi vıtse-mınıstr.
Sondaı-aq, qazirgi kezde memleket árbir memlekettik organ boıynsha bıýdjettik shyǵystardy aldyn ala esepteıdi.
— Memlekettik organnyń tıisti deńgeıde jumys isteýi úshin belgili bir bazalyq shyǵyndardyń bar ekenin bilemiz. Osy shyǵyndardyń naqty qajettiligin anyqtaý maqsatynda bes jyldyq derekterdi qamtyp, taldaý júrgizdik. Mundaı taldaý tetikteri tıimsiz shyǵyndardy anyqtaýǵa kómektesedi. Nátıjesinde, olardy bıýdjetten alyp tastaımyz. Aýqymdy jumys atqaryldy, sonyń arqasynda tek bıyldyń ózinde 44 mlrd teńge kólemindegi shyǵyn ońtaılandyryldy, – dedi Beısenbekuly.
Buǵan deıin úsh jylda bıýdjet tapshylyǵy qalaı ózgeretinin jazǵan edik.
