Bıýdjet esebinen iPhone: Qaraǵandyda aýdan ákimdigine qymbat smartfon ne úshin kerek boldy
QARAǴANDY. KAZINFORM — Qaraǵandy oblysyndaǵy memlekettik organ quny bir mıllıon teńgeden asatyn flagmandyq smartfon satyp aldy. Bul sheshim ákimdik qyzmetin aqparattyq súıemeldeýdiń sapasyn arttyrý qajettiligimen túsindirildi.
Qaraǵandy oblysynda Buqar jyraý aýdany ákiminiń apparaty memlekettik satyp alý portaly arqyly qymbat smartfon satyp alǵan. Qurylǵynyń quny 1 mıllıon teńgeden asty.
Memlekettik satyp alý júıesinde jarııalanǵan málimetke sáıkes, tapsyrys berýshi — «Buqar jyraý aýdany ákiminiń apparaty» memlekettik mekemesi. Lottyń tehnıkalyq sıpattamasynda Apple iPhone 16 Pro Max smartfony kórsetilgen. Bir danasynyń baǵasy 1 070 689 teńgeni quraǵan. Lot «satyp alý ótti» mártebesimen aıaqtalǵan.
Ótinimderdi qabyldaý 10–14 sáýir aralyǵynda júrgizilgen.
Ákimdik ókilderi satyp alýdyń aqparattyq-taldamalyq jumystyń sapasyn arttyrý qajettiligimen baılanysty ekenin túsindirdi.
— Buqar jyraý aýdany ákiminiń apparaty — ákim qyzmetin aqparattyq-taldamalyq turǵyda súıemeldeýdi qamtamasyz etetin mekeme. Memlekettik organnyń jumysyn buqaralyq aqparat quraldarynda jarııalaý — bıliktiń eseptiliginiń mańyzdy bóligi ári halyqty iske asyrylyp jatqan jáne aıaqtalǵan jobalar týraly tikeleı habardar etýdiń tıimdi arnasy. Osy jumystyń sapasyn arttyrý maqsatynda, joǵary ónimdiligi men tehnıkalyq sıpattamalaryn eskere otyryp, atalǵan qurylǵyny satyp alý týraly sheshim qabyldandy. Satyp alýǵa bólingen qarajat aýdandyq bıýdjettik komıssııa tarapynan maquldandy, — dep habarlady vedomstvo.
Sondaı-aq ákimdikte satyp alý rásimi memlekettik satyp alý týraly zańnamaǵa sáıkes baǵa usynystaryn suratý tásilimen ótkizilgeni atap ótildi.
— Shart jasasý jáne qurylǵyny satyp alý tek memlekettik organnyń qyzmettik qajettilikteri úshin júzege asyrylady, — dep tolyqtyrdy mekemede.
Aıta keteıik, býhgalterlik esep talaptaryna sáıkes smartfon memlekettik organnyń balansyna qoıylyp, oǵan túgendeý nómiri beriledi.
Buǵan deıin Qaraǵandy oblysynda memlekettik satyp alý boıynsha zań buzǵan 12 laýazym ıesi jazalanǵan bolatyn.
