Bıýdjet erejesine baǵynbaıtyn 30-dan astam qor bar – aýdıt
ASTANA. KAZINFORM – Ýtılalym sııaqty bıýdjettik baqylaýǵa jatpaıtyn parafıskaldyq qorlardyń sany 30-dan asqan. Bul týraly Joǵary aýdıtorlyq palata múshesi ıÝlııa Engel málim etti.
- Jańa Bıýdjet kodeksi qabyldanǵanǵa deıin bıýdjetten tys qorlardyń jumysy ákimshilendirý men baqylaýdan tys qalyp keldi. Olardyń jalpy eseptiligi jolǵa qoıylmaǵan. Bıýdjet kodeksi bıýdjetten tys qorlar uǵymyn aıqyndap, olar boıynsha eseptik aqparatty ashyp kórsetý tásilderin júıege keltirdi. Alaıda bul áli de jetkiliksiz. Mundaı qorlardyń naqty sany týraly senimdi aqparat pen tolyqqandy esep áli de joq, - dedi ol.
Al Bıýdjet kodeksinde bıýdjetten tys qordyń sany 4-ten aspaý kerek dep kórsetilgen.
- Bizdiń baǵalaýymyzsha, keminde 30 obektide osyndaı qor belgileri bar. Parafıskaldy tólemder erekshe nazar aýdarýdy qajet etedi. Óıtkeni qomaqty qarajat bıýdjetten tys ótip jatyr, - dedi JAP ókili.
Aıta keteıik, Májiliste Úkimetpen Joǵary aýdıtorlyq palatanyń 2025 jylǵy respýblıkalyq bıýdjettiń atqarylýy týraly esepteri qaralyp jatyr.
