Bıýdjet aqshasyn ıgerý: Baqyt Sultanov ońtústik pen soltústiktiń aıyrmashylyǵyn tapty

ASTANA. QazAqparat - Úkimettiń búgingi otyrysynda oblystardyń bıýdjet aqshasyn ıgerý máselesi qaraldy. Osy oraıda QR Qarjy mınıstri Baqyt Sultanov soltústik pen ońtústik óńirlerdiń aqshany birdeı ıgermeı jatýynyń sebebin jetkizdi, dep habarlaıdy QazAqparat tilshisi.

«Jergilikti bıýdjetterdiń shyǵystary 511 mlrd teńgege ıgerildi. 29 mlrd teńgege oryndalmady. Osy joly soltústik óńirler chempıon bolyp shyǵyp otyr. Qostanaı oblysy 99,9 protsentke, Soltústik Qazaqstan 99,5 protsentke, Pavlodar oblysy 99,2 protsentke ıgerip otyr. Biraq men oılaımyn, basqa oblystar, ásirese, ońtústik jáne batystaǵy áriptesterimiz kóktemniń sáýlesimen jylynyp, jańa aıtylǵan áriptesterin qýyp jetýge tyrysady dep oılaımyn», - dedi B.Sultanov.

Degenmen, barlyq óńirlerdiń shottarynda qaldyq aqshanyń kólemi 291 mlrd teńgeni qurap, jyl basymen salystyrǵanda eki esege ósti. Jyldyń basynda atalǵan kórsetkish 124 mlrd teńge bolǵan.

«Bunyń barlyǵy jergilikti qarjy-qarajatty tıimsiz basqarýdy, joǵaryda aıtyp ketkendeı kiristerdi josparlaý sapasynyń tómendegin kórsetedi. Sondyqtan jergilikti atqarýshy organdar bıýdjet qarajatyn tıimdi paıdalaný máselesine basa nazar aýdarýy qajet», - dep atap kórsetti Qarjy mınıstri.

Osydan keıin Úkimet basshysy Baqytjan Saǵyntaev onlaın baılanysta otyrǵan ákimderden jaýap alýǵa kiristi. Premer-Mınıstr soltústik óńirlerden bastady. Osy oraıda qarjy mınıstriniń sózin de eske aldy.

Osydan keıin qala men oblys basshylary bir-birlep esep berdi.