Bıýdjet: 8 mlrd teńge Almaty metrosyna jumsalady

ASTANA. QazAqparat - Búgin Májiliste «2018-2020 jyldarǵa arnalǵan respýblıkalyq bıýdjet týraly» QR Zańyna ózgerister men tolyqtyrýlar engizý týraly» zań jobasyn talqylaý kezinde 8 mlrd teńge Almatydaǵy kólik qozǵalysyna baǵyttalatyny málim boldy, dep habarlaıdy QazAqparat tilshisi.

«Almaty turǵyndarynyń qala ishindegi mobıldiligin arttyrý maqsatynda - bıýdjet jobasynda metronyń qoldanystaǵy 9 jáne bolashaqtaǵy 2 stansasyna operatsııalyq qyzmet kórsetý úshin elektropoıyzdardyń 8 quramyn alýǵa avans berý qarastyrylǵan. Osy sharalarǵa 8,1 mlrd teńgeni baǵyttaý kózdelgen», - dedi QR Qarjy mınıstri Álıhan Smaıylov.

Aıta ketý kerek, qalada «Saryarqa» men «Dostyq» stansalarynyń qurylysy júrgizilip jatyr. Qurylys jumystary 2020 jylǵa qaraı aıaqtalady dep kútilýde.

Budan buryn habarlanǵandaı, búgin Parlament Májilisinde bıýdjetti naqtylaý zań jobasy Shymkent qalasy men Túrkistan oblysynyń ákimshilik mártebelerine qatysty tapsyrmalardy oryndaý úshin ázirlengeni aıtyldy.