Byltyrdan beri terrorızmdi nasıhattaǵan 950-ge tarta saıt jabylyp, 150-niń isi sotta qaralýda - UQK
ASTANA. 14 qarasha. QazAqparat - Byltyrdan beri terrorızmdi nasıhattap kelgen 950 saıt jabylsa, qazirgi tańda sottarda 150 saıttyń isi qaralýda.
Bul týraly búgin Parlament Májilisiniń jalpy otyrysynda QR Ulttyq qaýipsizdik komıteti tóraǵasynyń orynbasary Qabdýlkárim Ábdiqazymov málim etti.
«Internet jelisi arqyly terrorızm ıdeıasyn aýqymdy nasıhattaý sharalary júzege asatyny shyndyq. Keıbir saıttarda tipti qoldan jasalatyn jarǵysh zattardyń nusqaýlyqtary da ornalastyrylady. Taktıka júrgizý, shabýyl jasaýǵa jáne terraktige úıretý, tartý, jıhadqa shaqyrý sekildi teris pıǵyldy ıdeologııa ınternette shyǵyp jatyr. Soǵan oraı byltyrdan beri sot organdary arqyly terrorızmdi, ekstremızm men zorlyq-zombylyqty nasıhattaıtyn osyndaı 950-ge jýyq saıt jabyldy. Búgingi kúni sottarda 150-ge tarta sondaı saıttardyń máselesi qaralýda»,-dedi UQK tóraǵasynyń orynbasary.
Onyń aıtýynsha, dańkestikti nasıhattaıtyn saıttar men olardyń serverleriniń basym bóligi eýropalyq zonada ornalasqan. Sondyqtan da mundaı saıttardy tolyq jabý keıde múmkin bolmaıdy.
«Osyǵan oraı biz elimizdiń ókiletti organdary arqyly búkil álemdik qaýymdastyqqa qatygezdik jelisine birlese qarsy turý týraly óz usynysymyzdy joldadyq»,-dedi Q. Ábdiqazymov.
