Byltyr júrgizilgen sanaqtyń málimetterin tolyq óńdep, osy jumysty aıaqtaý úshin 61,7 mln. teńge qajet - Á. Smaıylov
STANA. Mamyrdyń 24-i. QazAqparat /Qanat Mámetqazyuly/ - Byltyr 2009 jyly júrgizilgen ulttyq sanaq málimetterin tolyq óńdep, ony jarııalaý úshin bıýdjetten qosymsha 61,7 mln. teńge qajet etiledi. Búgin QR Parlamenti Májilisinde «Memlekettik statıstıkany jetildirýdiń basty baǵyttary» atty taqyrypta ótken Úkimet saǵatynda QR Statıstıka agenttiginiń tóraǵasy Álıhan Smaıylov osylaı málim etti,
dep habarlaıdy QazAqparat.
Agenttik tóraǵasynyń aıtýynsha, byltyrǵy jylǵy halyq sanaǵynyń qysqasha qorytyndysy aǵymdaǵy jylǵy aqpannyń basynda jarııalanǵan. Bul qysqasha qorytyndyda elimizdegi jalpy halyqtyń sany, ulttyq quram, qalalyq jáne aýyldyq jerdiń turǵyndar sany, erler men áıelder sany týraly málimetter berilgen. Al jaqyn aralyqta sanaqtyń kelesi qorytyndysy jaryqqa shyǵady. Onda azamattardyń dinı ustanymy, azamattyǵy, memlekettik tildi meńgerýi, halyqtyń óńirlerde ornalasýy, óńirlerdegi ulttyq quramdar týraly málimetter qamtylady.
«2009 jyly júrgizilgen ulttyq sanaq qorytyndysynyń keshigýine birqatar sebepter bar. Máselen, byltyrǵy jyly qorytyndylardy baqylaý jónindegi jumystar tolyq aıaqtalmady. Budan bólek, málimetterdi óńdeý boıynsha baǵdarlamada kemshilikter oryn aldy, biz bunyń birqataryn qaıta jazyp shyqtyq. Sondaı-aq byltyr osy maqsatqa bólingen 4 mlrd. 200 mln. teńgeniń 1 mlrd. teńgege jýyǵy bıýdjetke qaıtarylyp berildi», dedi Á. Smaıylov. Onyń aıtýynsha byltyrǵy jyly oryn alǵan kemshilikterdiń saldarynan 300 myńǵa tarta qaıtalanyp ketken málimetter óshirilip, 1 mln.-ǵa jýyq adamnyń jastaryn qaıta túzeýge týra kelgen.
«Eń basty másele - áli kúnge deıin aǵymdaǵy jyl boıynsha byltyrǵy ulttyq sanaq málimetterin óńdeýdi qarjylandyrýǵa qarajat bólinbeı otyr. Statıstıkalyq jınaqtardy baspadan shyǵarýǵa bıylǵy bıýdjetten bar joǵy 19 mln. teńge bólingen bolatyn, biraq qalǵan málimetterdi óńdeý, olardy kestelep shyǵarýǵa qarajat qarastyrylmady», dedi agenttik tóraǵasy. Onyń aıtýynsha, osy máselege qatysty bıýdjettik josparlaý barysynda tapsyrys berilgenimen de, ol qoldaý tappaǵan. Tóraǵanyń sózine qaraǵanda sanaqtyń qalǵan málemetterin óńdeý úshin qosymsha 61,7 mln. teńge qajet eken.
«Biz qazirgi kúni bul jumysty ózimizdiń ishki resýrstarymyzdyń esebinen júrgizip kelemiz. Sondyqtan da, byltyrǵy jylǵy sanaq málimetterin óńdeý men jarııalaý jumystary tym baıaý júrgizilýde. Degenmen, biz jaqyn aralyqta sanaq málimetteriniń kelesi qorytyndylaryn jarııalaýdy josparlap otyrmyz», dedi Á. Smaıylov.
