Byltyr JІÓ 5 paıyzdy qurady - E. Dosaev
ASTANA. 4 naýryz. QazAqparat - Byltyr naqty ishki ónimniń kórsetkishi 5 paıyzdy qurady. Búgin Májilistegi Úkimet saǵatynda baıandama jasaǵan Ekonomıka jáne bıýdjettik josparlaý mınıstri Erbolat Dosaev osylaı málim etti.
«Álem ekonomıkasynyń nashar damýy jaǵdaıynda ósim qarqyny josparlanǵan parametrleri birqatar kórsetkishte tómen qalyptasty. Buǵan syrtqy suranystyń qysqarýy, sondaı-aq ósimdik sharýashylyǵynyń jalpy ónimi óndirisiniń 27,7 paıyzǵa tómendeýi jáne munaı óndirýdiń josparlanǵan 81 mln tonnadan 79,2 mln.-ǵa deıin tómendeýi negizgi sebep boldy. Taýarlar óndirisi salalaryndaǵy báseń qarqyn qyzmet kórsetý salasymen tolyqtyryldy. Osylaısha kólik qyzmeti 7,2 paıyzǵa joǵarylady», deıdi Erbolat Dosaev.
Onyń aıtýynsha, baılanys qyzmeti 9,6 paıyz ósken. Al kóterme jáne bólshek saýdanyń ósimi 14,6 paıyzdy quraǵan. Negizgi kapıtalǵa ınvestıtsııa kólemi 3,8 paıyzdy, qurylys 2,9 paıyzdy quraǵan.
«Álemdik suranystyń báseńdeýine qaramastan eldiń syrtqy taýar aınalymy 9,8 paıyzǵa joǵarylady. Aldyńǵy jyldyń sáıkes kezeńine qaraǵanda taýarlar eksporty 10,3 paıyz, ımporty 20,2 paıyzǵa artty», deıdi mınıstr.
