Byltyr jemqorlarǵa 2 mlrd teńgeden astam aıyppul salynǵan

ASTANA. QazAqparat -  2017 jyly 441 jemqorǵa 2 mlrd teńgeden astap aıyppul salyndy. Bul týraly búgin sot tóreligin júzege asyrýdyń 2017 jylǵy qorytyndysyna arnalǵan keńeıtilgen keńeste QR Joǵarǵy soty Qylmystyq ister jónindegi sot alqasynyń tóraǵasy Abaı Rahmetýlın aıtty, dep habarlaıdy QazAqparat.

Tóraǵanyń aıtýynsha, 2017 jyly aıyppul salý sharasyn qoldaý birshama tómendegen. Munyń birqatar sebebi de bar.

«Bul negizinen aıyppul kóleminiń úlken bolýyna baılanysty tulǵanyń tólem qabiletsizdigi bolyp otyr. Saraptama kórsetkendeı, jemqorlyq quqyq buzýshylyq jasaǵany úshin 441 tulǵaǵa aıyppul jazasy belgilenip, úkimge sáıkes 2 mıllıard teńgeden astam aıyppul belgilengen. Zańdy kúshine engen úkimder boıynsha jalpy alǵanda jemqorlyq iske qatysy bar 63 tulǵanyń aıyppuldaryn tóleı almaýyna baılanysty jaza basqaǵa aýystyryldy», - dedi Abaı Rahmetýlın.

Onyń aıtýynsha, Qylmystyq-protsessýaldyq kodekske qylmystyq iske tartylǵan tulǵalardyń quqyqtary men múddelerin qorǵaýdy qamtamasyz etýge baǵyttalǵan birqatar novella engizilgen. Solardyń biri - protsessýaldyq kelisim, ınstıtýty, kináni moıyndaý týraly mámile.

 

«Protsessýaldy kelisim isteri boıynsha da ósim baıqalady. Sotqa túsken jáne qaralǵan isterdiń de sany arta tusýd. 2017 jyly protsessýaldyq kelisimmen 4 240 is aıaqtaldy. Degenmen, tájirıbe protsessýaldyq  kelisimdi qoldanýdy jetildirý qajettigin kórsetip otyr», - dedi ol.

Rahmetýlınniń sózine qaraǵanda, bul birinshi kezekte zańdylyqqa, ádildikke jáne ózge de tulǵalardyń da quqyqtary men múddelerin buzbaýǵa saı bolýy tıis.

«Tek Joǵarǵy sot qana 2017 jyly kassatsııalyq tártippen 17 tulǵaǵa qatysty 9 úkimdi joıdy. Atalǵan ister protsessýaldyq kelisim aıasynda qaralǵan. Biraq, kináni moıyndaý týraly mámileniń jasalý nátıjesinde úshinshi tulǵalardyń quqyǵy buzylǵan», - dedi sot alqasynyń tóraǵasy.