Byltyr jedel járdem qyzmeti 7,2 mln ret kómek kórsetýge barǵan
ASTANA. QazAqparat - 2018 jyly 103 qyzmetin jańǵyrtý nátıjeleri jarııa etildi, dep habarlaıdy QazAqparat.
Atalmysh nátıjede, 2018 jyly jedel medıtsınalyq kómek qyzmeti 7 255 000 shaqyrtýǵa qyzmet kórsetkeni atalyp ótilgen.
«2018 jyldyń qorytyndysy boıynsha shuǵyl medıtsınalyq kómek kórsetýdiń eki deńgeıli modelin engizý nátıjesinde patsıentke jetý ýaqyty aıtarlyqtaı qysqardy. Shuǵyl medıtsınalyq kómek kórsetýdiń halyqaralyq standarttaryn engizý jalǵastyryldy. Osylaısha, medıtsınalyq kómek kórsetý sapasyn arttyrý kórsetkishi 2016 jylmen salystyrǵanda 2018 jyly sátti reanımatsııa kórsetkishi 11% - ǵa jaqsardy: 2016 jyly kórsetkish 35,7% - dy, 2017 jyly - 40,5% - dy, 2018 jyldyń sońynda josparly kórsetkish 45% - dy qurady, 2018 jyldyń 12 aıynyń qorytyndysy boıynsha sátti reanımatsııa kórsetkishi jedel medıtsınalyq kómek qyzmetkerlerimen júrgizilgen barlyq reanımatsııanyń 46,7% - yn qurady», - delingen habarlamada.
103 qyzmetiniń materıaldyq-tehnıkalyq bazasy kúsheıtilgen.
«2016 jylmen salystyrǵanda 2018 jyldyń qorytyndysy boıynsha medıtsınalyq jabdyqtarmen jabdyqtaý 4 paıyzǵa artyp 87% quraǵan.
2016-2017 jyldarmen salystyrǵanda GPS navıgatsııasymen jabdyqtaý jaǵdaıy jaqsardy. Sondaı-aq sanıtarııalyq kólikpen qamtamasyz etý artty. 2018 jyldyń qorytyndysy boıynsha qyzmettiń sanıtarııalyq kólikpen jabdyqtalýy 99% qurady», - delingen habarlamada.
Pılottyq joba sheńberinde statsıonarlardyń qabyldaý bólimsheleri jumysynyń jańa formaty engizildi: mamandardy oqytý, standarttardy engizý, redızaın jáne qaıta qurý, materıaldyq-tehnıkalyq jaraqtandyrýdy jaqsartý bastaldy.
Eske slaa ketsek, QR Densaýlyq saqtaý mınıstri Eljan Birtanov jedel járdemniń jetý ýaqyty 15 mınýtqa sheıin qysqarǵanyn málim etken bolatyn.
«Halyqtyń maǵan kóbine shaǵymdanatyn negizgi úsh problemasy bar ol - emhanalardaǵy kezek, naýqastardy qabyldaıtyn bólmelerdiń jumys formaty jáne jedel járdem brıgadasynyń jetý ýaqyty. Bul mehanızmder bir-birimen ózara baılanysty. Óńirlermen 103 qyzmetin jetildirý jumystarynyń ótken jyl boıynsha qorytyndy jıynyn ótkizdik. Jumys nátıjeleriniń biri retinde emhanalardyń sozylmaly aýrýy bar emdelýshilermen jumystyń jaqsarýy. Oǵan dálel sozylmaly aýrýdyń asqynýy boıynsha jedel járdem kómegine júginý dınamıkasynyń azaıýy. 2018 jyldyń sońynda atalǵan másele boıynsha jedel járdemdi shaqyrtý 584 743-ke deıin qysqarǵan», - dep jazdy Eljan Birtanov Feısbýk paraqshasynda.
