Byltyr uıymdasqan qylmystyń 368 múshesi jaýapqa tartyldy - ІІM orynbasary
ASTANA. 25 qańtar. QazAqparat /Qanat Mámetqazyuly/ - Byltyr elimizde uıymdasqan qylmystyń 368 múshesi jaýapqa tartyldy.
Búgin QR Parlamenti Májilisinde ««Qazaqstan Respýblıkasynyń keıbir zańnamalyq aktilerine uıymdasqan qylmysqa qarsy is-qımyl máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda Qazaqstan Respýblıkasy Іshki ister mınıstriniń orynbasary Amantaı Áýbákirov osylaı málim etti.
«Uıymdasqan qylmys toptarynyń áreketine qatysty 29 qylmystyq is qozǵalsa, 8 qylmystyq is qaraqshylyqqa qatysty bolyp otyr. Sonymen qatar, resmı izdeý jarııalanǵan qylmystyq toptyń 25 múshesi quryqtaldy. Sondyqtan da, búgingi kúni Qazaqstanda uıymdasqan qylmysqa qarsy kúres sharalary tolyq júzege asyp jatyr dep aıtýǵa bolady», - deıdi ІІM orynbasary A. Áýbákirov.
Sonymen qatar mınıstr orynbasarynyń aıtýynsha, 2005 jyldan beri qaraı TMD aýmaǵynda uıymdasqan qylmystyq toppen kúres zańnamalary qataıýyna baılanysty Qazaqstanǵa «qylmys áleminiń bedeldileri» aıaq basa bastaǵan. Sondyqtan da, sońǵy jyldary mınıstrlik uıymdasqan qylmyspen kúresti kúsheıtip otyr. «Biz Reseıdiń arnaıy organdarynda esepte turǵan 400-ge tarta uıymdasqan qylmys «serkeleriniń» Qazaqstanǵa kelýine tyıym saldyq. 2005-2007 jyldary TMD aýmaǵynan Qazaqstanǵa kelgen 5 «qylmys áleminiń bedeldisi» quryqtalyp, olar bas bostandyǵynan aıyrylǵan bolatyn. Jaza merzimi ótelgen soń ondaı qylmyskerler elden shyǵarylady», - dedi A. Áýbákirov.
