Byltyr ushyrylǵan eki ǵarysh apparaty Qazaqstannyń menshigine áli ótken joq - T.Musabaev

ASTANA. QazAqparat - Byltyr elimizden ushyrylǵan eki ǵarysh apparaty Qazaqstannyń menshigine áli ótken joq. Bul týraly búgin Parlament Senatynyń jalpy otyrysynda Investıtsııalar jáne damý mınıstrligi Aeroǵarysh komıtetiniń tóraǵasy Talǵat Musabaev málim etti. Eske salaıyq, jalpy otyrysta «2009 jylǵy 6 qazandaǵy Qazaqstan Respýblıkasynyń Úkimeti men Frantsýz Respýblıkasynyń Úkimeti arasyndaǵy Jerdi qashyqtyqtan zondtaýdyń ǵarysh júıesin jáne ǵarysh apparattarynyń qurastyrý-synaý keshenin qurý men paıdalaný sharttary týraly kelisimge ózgerister men tolyqtyrýlar engizý týraly hattamany ratıfıkatsııalaý týraly» Zań qabyldanǵan bolatyn.

«2014 jyly Qazaqstannyń Jerdi qashyqtyqtan zondtaıtyn eki ǵarysh apparaty orbıtaǵa shyǵarylǵan. Joǵary jáne ortasha dáldiktegi bul apparattardy ushyrý bizdiń tarıhymyzda oryn alyp otyr. Alaıda, búgingi kúnge deıin eki ǵarysh apparaty áli de Qazaqstannyń menshigine berilmeı keledi. Óıtkeni, Qazaqstan men Frantsııa arasyndaǵy kelisim boıynsha Jerdi qashyqtyqtan zondtaýdyń ǵaryshtyq júıesin qurý jobalarynda bólingen qarajatqa qosymsha qosylǵan qun salyǵy qarastyrylmaǵan. Biz osy máseleni sheship, eki spýtnıkti ózimizge alǵan kúnnen bastap, ony kommertsııalyq maqsatta paıdalana bermekpiz», - dedi T.Musabaev.

Onyń aıtýyna qaraǵanda, qazaqstandyq eki apparat qazirgi kúnniń ózinde jumys istep, memlekettik organdarǵa tıisti málimetter usyný boıynsha óz septigin tıgizýde.

«Máselen, Qorǵanys mınıstrligi ótken birneshe aılarda túsirilim fotolaryn suraǵan bolatyn. Onyń somasy 1,5 mlrd teńge shamasynda boldy», - dedi T.Musabaev.

Budan bólek, komıtet basshysy aldaǵy ýaqytta Qazaqstan men Frantsııa arasyndaǵy kelisimge oraı, ǵarysh apparattarynyń synaq-keshenin qurastyrý nysany boı kóteretinin atap ótti. Bul Qazaqstandaǵy ǵarysh ınfraqurylymynyń eń iri nysandarynyń birine aınalmaq ári qazaqstandyq mamandar jumys isteıtin ol nysan túrli sıpattaǵy ǵarysh appaparattarynyń synaǵyn tolyqtaı tsıklmen ótkizýdi qamtamasyz etedi. Bundaı nysan TMD elderinde bolmaǵan.