Byltyr sottar tarapynan qylmystyq qýdalaý organdaryna 2 myńǵa jýyq materıal joldansa, sonyń 5 paıyzyna ǵana is qozǵalǵan
ASTANA. Aqpannyń 17-si. QazAqparat /Qanat Mámetqazyuly/ - 2009 jyldyń 12 aıynda respýblıka boıynsha qylmystyq qýdalaý organdaryna 2 myńǵa jýyq materıal joldansa, solardyń ishinen 101-ine, ıaǵnı 5 paıyzyna ǵana qylmystyq is qozǵaldy.
Bul týraly QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine atqarýshylyq is júrgizý organdarynyń qyzmeti máseleleri boıynsha ózgerister men tolyqtyrýlar engizý týraly» zań jobasyn talqylaý barysynda QR Joǵarǵy Soty janyndaǵy Sot ákimshiligi komıteti tóraǵasynyń orynbasary Baqtııar Ónerbaev málim etti, dep habarlaıdy QazAqparat.
«Búgingi tańda sot sheshimderin oryndaý tártibin buzý, sot tóreligin júzege asyrýǵa kedergi jasaý jáne sotty qurmettemeýshilik qylmystary úshin jaýapkershilikti qamtamasyz etýdiń tıimdi tetiginiń bolmaýy sot oryndaýshysynyń jáne sot sheshimin shyǵaratyn sýdıanyń búkil jumysyn joqqa shyǵaryp otyr. Tájirıbeni taldaý barysynda, sot aktilerin qasaqana oryndamaıtyn, sondaı-aq oryndaýǵa kedergi keltiretin tulǵalardy qylmystyq jaýapkershilikke tartý tetiginiń tıimdiligi tómen bolyp otyrǵany anyqtaldy. Máselen, 2009 jyldyń 12 aıynda respýblıka boıynsha qylmystyq qýdalaý organdaryna 2 myńǵa jýyq materıal joldanǵan. Solardyń ishinen 101-ine, ıaǵnı 5 paıyzyna ǵana qylmystyq is qozǵaldy. 1 myń 520 materıal boıynsha qylmystyq is qozǵaýdan bas tartyldy. Osyndaı jaıt 2007-2008 jyldary da oryn aldy», dedi B. Ónerbaev.
Onyń aıtýynsha, sot úkimin, sot sheshimin nemese basqa da sot aktisin oryndamaýmen baılanysty qylmystyq isterdi tergeý sharalary ishki ister organdaryna berilgennen bastap atalǵan máseledegi tıimdilik múldem tómendep ketken. «Bundaı qylmystar sot tóreliginiń bedeline nuqsan keltiredi, jábirlenýshiniń ary men abyroıyna zalal keltire otyryp, moraldyq zııanǵa soqtyrady», dedi B. Ónerbaev.
