Byltyr sot-saraptamaǵa 190 myńnan astam materıal tústi – Ádilet mınıstrligi

NUR-SULTAN. QazAqparat – Ádilet vıtse-mınıstri Almat Madalıev 2019 jyly sot-saraptama, sot aktilerin oryndaý jáne memlekettiń múliktik quqyqtaryn qorǵaý boıynsha jumys baǵyttaryn baıandady, dep habarlaıdy QazAqparat tilshisi.

«2019 jyly sot-saraptamaǵa 190 myńnan astam materıal kelip tústi. Oryndalǵan saraptamalardyń úlesi 96 paıyzdan asty. Osylaısha, mınıstrliktiń Strategııalyq josparynyń tıisti kórsetkishine qol jetkizildi. Bul rette, oryndalmaı qaıtarylǵan materıaldar sany aıtarlyqtaı qysqardy (2019 jyly – 2 238, 2018 jyly – 3 014). Qaıtalama saraptamalar sany 11 paıyzǵa azaıdy (257-den 229-ǵa deıin, onyń 153-i rastalǵan, 30-y rastalǵan joq, 26-y ishinara rastalǵan)», - dep naqtylady vıtse-mınıstr vedomstvonyń keńeıtilgen alqa májilisinde.

Onyń sózine qaraǵanda, 2019 jyly aqyly qyzmetter boıynsha ósimge qol jetkizildi. Jyldyń korytyndysy boıynsha 386 mln teńge kóleminde aqyly qyzmetter kórsetildi.

Budan bólek ol halyqpen jumys kórsetkishterine toqtaldy.

«Eseptik kezeńde barlyǵy 383 ótinish kelip tústi. Bul ótken jylmen salystyrǵanda 25 paıyzǵa artyq (2018 j. - 306 ótinish). Alaıda, aryzdardyń basym bóligi óziniń rastaýyn tappaǵanyn atap ótken jón. Tekserý barysynda tek 6 ótinish rastaldy. Qaraý nátıjeleri boıynsha 16 qyzmetker tártiptik jaýapkershilikke tartyldy», - dedi A. Madalıev.