Byltyr Sıngapýrda bolǵan týrıster sany rekordtyq kórsetkishke jetti

ASTANA. QazAqparat - Byltyr Sıngapýrǵa barǵan týrısterdiń sany rekordtyq kórsetkish - 15,5 mıllıonǵa jetken. Bul 2012 jylmen salystyrǵanda 7,2 paıyzǵa kóp, dep jazady Straits Times gazeti.

Alaıda Sıngapýr týrıstik bıýrosynyń málimetteri boıynsha týrısterden túsken paıda 2012 jylǵy kórsetkishten 400 mln. dollarǵa ǵana ósip, barlyǵy 23,5 mlrd. dollarǵa jetken. Bul - 2009 jyldan bergi eń az tabystardyń biri.

Aıta keteıik, kip-kishkentaı Sıngapýr memleketi álemdegi teńiz jáne áýe joldary túıisetin negizgi núktelerdiń birinde ornalasqan. 2012 jylǵy derekter boıynsha, ondaǵy «Changa» halyqaralyq áýejaıyn paıdalanýshylar sany ol salynǵan 30-dan astam jyldan beri birinshi ret 51,2 mıllıon adamǵa jetken. Bul 2011 jylǵy kórsetkishten 10 paıyzǵa joǵary. Halqynyń sany 5 mıllıonnan endi asqan qala-memlekettiń áýejaıyn paıdalanýshylar nebary 3 jyl buryn 40 mln. adam bolǵanyn eskersek, bul - úlken jetistik.