Byltyr «Samuryq-Qazyna» qorynda óndiristegi jazataıym jaıttar boıynsha qylmystyq is qozǵalǵan joq

ASTANA. QazAqparat – «Samuryq-Qazyna» qorynyń qoǵammen baılanys, áleýmettik eńbek qatynastary jáne eńbekti qorǵaý jónindegi basqarýshy dırektory Ǵıbrat Aýǵanov óndiristegi jaraqattar men qaıǵyly jaıtardyń negizgi sebepterin atady, dep habarlaıdy QazAqparat tilshisi.

Onyń sózinshe, qorǵa tıesili kásiporyndarda jaǵdaı birtindep jaqsaryp keledi.

«Meniń bilýimshe, qaıǵyly jaıttardyń sany byltyrǵymen salystyrǵanda 11% azaıyp otyr», - dedi ol BAQ ókilderiniń suraǵyna bergen jaýabynda.

Sondaı-aq, ol óndiristegi jazataıym jaıttardyń kóbi qaýipsizdik tehnıkasyn saqtamaýdan, jumys isteıtin oryndy durys uıymdastyrmaýdan jáne jumysshylardyń óz kinásinen bolatynyn aıtty.

«Ár jaǵdaı boıynsha ókiletti organdardyń qatysýymen qyzmettik tergeý júrgiziledi. Komıssııa jumys berýshi men jumysshynyń kinási qandaı ekenin anyqtaıdy. Sonyń aıasynda qylmystyq jazaǵa deıin sharalar qoldanylady», - dedi Ǵıbrat Aýǵanov.

Onyń aıtýynsha, byltyr birneshe jazataıym oqıǵa bolǵanymen, qylmystyq is qozǵalmaǵan.

«2-3 aýyr jaǵdaı boıynsha qyzmettik tergeý áli júrip jatyr», - dedi qordyń basqarýshy dırektory.