Byltyr «Samuryq-Qazyna» qoryna qarasty kompanııalardyń ortalyq apparatynda ákimshilik-basqarý shyǵyndary 15 paıyzǵa azaıdy

Bul týraly QazAqparat Qordyń baspasóz qyzmetine silteme jasap habarlaıdy.

«Samuryq-Qazyna» qory daǵdarysqa qarsy fýnktsııalarynan ózge óziniń enshiles kompanııalardaǵy tıimdilikti arttyrý sharalaryn da júzege asyryp keledi. Bul rette álemdik kompanııalar sııaqty shtat sanyn ońtaılandyrý, shyǵyndy azaıtý sekildi sharalar da júrgizilýde. Qazirgi kúni Qorda jáne onyń enshiles kompanııalarynda 3 kezeńge josparlanǵan shyǵyndardy tómendetýdiń alǵashqy kezeńi atqaryldy», delingen baspasóz baıanynda.

Toqtala ketetin jaıt, ońtaılandyrýdyń alǵashqy satysy boıynsha 2008 jyldyń sońyna taman kompanııalardyń shyǵyndary josparlanǵannan 10,6 mlrd. teńgege azaısa, onyń ishinde 3,9 mlrd. teńgesi ákimshilik shyǵyndar bolyp otyr. Al ekinshi kezeń boıynsha, Qordaǵy kompanııalardyń bıýdjetterin bekitken kezde kompanııalardyń aǵymdaǵy shyǵyndary 99 mlrd. teńgege qysqaryp, onyń ishinde ákimshilik shyǵyndary 28 mlrd. teńgege azaıǵan. Al úshinshi kezeńde - 2009 jyldyń naýryz-sáýir aılarynda Qordyń ózinde jáne enshiles kompanııalarynyń ortalyq apparatynda ákimshilik shyǵyndar qysqartyldy. Kompanııalardyń ortalyq apparatynda ákimshilik-basqarý shyǵyndary 15 paıyzǵa azaıdy. Budan bólek, kompanııalar qurylymynda ońtaılandyrý deńgeıleri yqshamdalyp, bir-biriniń qyzmetin qaıtalaıtyn qurylymdar qysqarǵan. Eńbekaqy tóleý kórsetkishi de búkil kompanııalarda 30 paıyzǵa azaıdy.

«Qazir enshiles kompanııalardaǵy ońtaılandyrýdyń ekinshi kezeńi júrgizilýde. Bundaǵy negizgi maqsat - bıznes-úderisterdiń deńgeıin Qordyń strategııalyq maqsattary deńgeıine jetkizý, olarǵa yńǵaıly, strategııalyq maqsatqa jetý úshin uıymdastyrý qurylymdaryn ornyqtyrý, Qorda birin biri qaıtalaıtyn jaıttardy joıý, Qordaǵy kompanııalar arasyndaǵy jaýapkershilikti naqty retteý bolyp tabylady. Іri kompanııalardaǵy bul shara aǵymdaǵy 2010 jyly maýsym aıynda aıaqtalady», delingen baspasóz baıanynda.